Read Kilivila SAM 40 Bible Online

SAM 40 - Kilivila bible

SAM 40

¹Yeigu avinagai paila Guyau la pilasi, e inakaigalaigu goli, ilagi ulo dou.

²Ikatusunupuloiyaigu metoya makwaina mlopu mwada gala basalili opwadidiweta saina sunusonu. Isailigu odukutotu e bogwa labwaina, e gagabila baliloula bwaina.

³Ivitulokaigu agu wosi pilavau kidamwa bawosi, e mapilana goli wosila yakaula paila da Yaubadasi. Bidubadu tomota bigisaisi baisa e bogwa bidubumaisi Guyau.

⁴Bitamwasawa kidamwa tadubumi Guyau, e gala wala tatovila mwada bitatemmali avai tokolu, kainaga bitatoulala osi tapwaroru matausina ititapwarorusi baisa yaubada sasopa.

⁵Mwa! Guyau ma Yaubadasi, saina bidubadu m mitakwai baisa yakamaisi. Gala goli taitala bipataim! Bidubadu vavagi bogwa lokunigibau paila wala yakamaisi. E kidamwa bavitouula lilivala paila makwaisina, gala wala bavinaku, paila saina bidugaga!

⁶Yoku gala magim lula kaina semakavi. Gala magim bakagabwaisi mauna namwaidona okabolula, e gala wala magim avai lula mwada mitugaga kala ligaiwa. Kaimapula goli lokusakaigu taigagu,[100] kidamwa baligimlilaim,

⁷e mapaila avitakaulokaim kawagu, “Mayeigu ka! Lokusakaigu mapilana bukila Guyau la Karaiwaga, e olumoulela mapilana bogwa babani agu kwatuloluta.

⁸E mwa! Yaubada, nanom baisa kwembwailigu, e m vituloki akakabikaula baisa onanogu.”

⁹E Guyau, bogwa lakamituli bulogala bwaina kidamwa yoku kukolaimasi, e akamituli osi sigugula[101] m tomota komwaidona. Ka, yoku kunikolibogwi kidamwa gala wala avai tuta basim kamatula paila makwaina.

¹⁰Gala ayusi bulogala katumova paila titoulegu wala. Tuta tuta lalilivala paila yoku tokimadagi deli topilasi. Osi sigugula komwaidosi m tomota gala wala akapatu, mitaga lalilivala paila m giyoubwaila deli m mitakwai.

¹¹E Guyau, anikoli kidamwa gala kwaitala tuta bukusaim m nokapisi baisa yeigu. Paila yoku m giyoubwaila deli m yebwaili bikolaigu tuta komwaidona.

¹²Bidubadu vavagi mwau ititoulaigusi, e gala goli gagabila bakalau! Komwaidona ulo mitugaga eiyosaigusi, e gala gagabila bagisi avaka.[102] Mitugaga makwaisina kasi bawa ikalisau kala bawa kulugu, e ulo tuvaluwa bogwa eitamwau.

¹³Mwa Guyau! Kukwatumovaigu! Tuta baisa wala bukupilasaigu!

¹⁴Ibodi matausina availa availa mwada bikatumataigusi bimamasi deli bitakainowasi. Ibodi matausina availa availa imwasawasi paila uula yeigu aboda mwau, bitovilasi bikaimilavausi deli kasi mmosila.

¹⁵Ibodi matausina availa availa iyosokanaigusi, biyowa luposi sainela paila leimamasi.

¹⁶Ibodi komwaidosi availa availa imakaiamsi bimwasawasi deli ninasi kala mwamwasila. Ibodi komwaidosi availa availa ilivalasi biga nokagutoki paila m kwatumova tuta tuta bililivalasi kawasi, “O Guyau, saina Tovakaigaga yoku!”

¹⁷E Guyau, yeigu tomama e tonamakava goli yeigu, mitaga yoku gala kulumwelavaigu. Yoku agu tokwatumova e ulo Yaubada yoku. Mwa! Nani bukuma kupilasaigu!