Read Kilivila SAM 41 Bible Online

SAM 41 - Kilivila bible

SAM 41

¹Bimwasawasi matausina availa availa ininamsaisi paila tonamakava. E Guyau bipilasi wala matausina avai tuta bibodasi mwau.

²Guyau bikoli matausina deli biyamati si momova. Bivigaki matausina bimwasawasi osi valu, e gala wala bisilavi matausina bilosi oyumasi kasi tilaula.

³Guyau bipilasi matausina avai tuta bikatoulasi, deli biyomovi bibwainasi, e bikaitubwasi.

⁴Yeigu akaibiga kawagu, “Mwa Guyau! Bogwa wala lamitugaga omatam. Mapaila kunokapisaigu deli kukwatumovaigu.”

⁵Agu tilaula ililivalasi biga vakatutuki paila yeigu. Magisi wala bakaliga e bogwa bitotilaki ninasi.

⁶Matausina availa availa imaisi igisaigusi gala wala tokwamokwita. Matausina ikauwaisi biga sopa paila yeigu, e oluvi ilauwaisi ambaisa ambaisa ililivalaigusi.

⁷Komwaidosi matausina availa availa tokukolosi yeigu ikikasilamwaigusi wala. Oninasi ininamsaisi vavagi saina gaga paila yeigu.

⁸Ikaibigasi kawasi, “Katoula wala bogwa bikimati. Matauna gala tuvaila bikanilavi kabala.”

⁹Deli goli lubaigu tatougu, matauna adubumi mokwita, deli kama kaboma kaitala, e matauna bogwa goli eitotubulokaigu.

¹⁰Mwa Guyau! Kunokapisaigu, kuyomovaigu babwaina e bakaitubwa, e bamapuga yumasi agu tilaula.

¹¹Matausina gala bitomgwagasi odabagu, e yeigu banikoli mwada yoku bogwa imwamwasila nanom paila yeigu.

¹²E yoku bukupilasaigu, paila uula avagi avaka duwosisia, e yoku bukusividulaigu taitu taitu.

¹³Kala yakaula Guyau, matauna mina Isireli si Yaubada! Kala yakaula matauna tuta baisa, e tuta gala biwokuva! Emeni! Emeni![103]