Read Kilivila SAM 44 Bible Online

SAM 44 - Kilivila bible

SAM 44

¹Mwa Yaubada! Bogwa kaligakaisi taigamasi. Tubumaiasi eisailiusi bulogasi makwaisina vavagi topilaveka lokuvagi osi tuta, tuta omitibogwa.

²Ilivalasi ammakawala yoku titoulem kubokavili matausina gala inikolaimsi,[108] e kusailiga m tomota osi valu. Kumipuki mabudosina boda ituwoli ituwoli, e kuvigaki mabudona m tomota bisibwabwailasi.

³M tomota gala iyoulisi valu metoya osi kema titoulesi. Matausina gala itomgwagasi metoya osi peula titoulesi, mitaga metoya wala om peuligaga, e omatam wala kuvakwabu, e baisa kuyomitali kidamwa yoku kuyebwaili matausina.

⁴Yoku ulo Guyau deli ulo Yaubada. Kuvigaki m tomota bitomgwagasi,

⁵e metoya om peula kakalisauwaisi kama tilaulasi.

⁶Gala wala adubumi ulo kaiyala kaina ulo kema kidamwa bikolaigusi.

⁷Mitaga yoku bogwa kukolaimasi metoya kama tilaulasi e kukwalisau matausina mina kukolosi yakamaisi.

⁸Bakayakawolaimsi tuta komwaidona deli bakanokagutokisi baisa yoku tuta gala biwokuva.

⁹Mitaga baisa tuta bogwa kupakaimasi e kutagwala bikalisauwaimasi. Gala wala tuvaila kuvakwabu ma tokwabiliasi.

¹⁰Yoku lokuvigakaimasi lakasakaulasi metoya kama tilaulasi, e matausina ivayoulisi ma guguwasi ilauwaisi.

¹¹Yoku kutagwala kidamwa bikatumataimasi makawala sipi. Bogwa kukwatugaiyaimasi lakalosi osi valu togilagala.

¹²Yakamaisi m tomota bogwa kugimolaimasi e mapumasi kusaili watanawa, paila kudokaimasi mwada yakamaisi gala wala isim dimlemasi.

¹³Matausina otalimasi[109] igisaisi avaka lokuvigakaimasi, e iyosokanaimasi deli igigilaimasi.

¹⁴Yoku kuvigakaimasi kabokalawou oluwalaisi boda ituwoli ituwoli. Ikatugougeunasi baisa yakamaisi deli si kavilavila.

¹⁵Yeigu tuta komwaidona iyomsilaigusi wala. Mmosila wala ikatumataigu

¹⁶paila uula anakaigali si vakaluwou deli si bigigaga agu tilaula deli goli matausina eivigakaigusi tokukolosi.

¹⁷Komwaidona vavagi makwaisina bogwa iviloubusisi baisa yakamaisi, ilagoli gala kalumwelavaimsi e gala goli kakotunaisi kabutu makwaina lokuvagi[110] deli yakamaisi.

¹⁸Yakamaisi gala wala kakoulovaimsi, e gala wala kakoulovaisi m kwaraiwaga makwaisina.

¹⁹Mitaga yoku kuluvaimwaimasi iuwakaimasi neuya oluwalaisi mauna nagigasisi, e kusilavaimasi odubilikitakita.[111]

²⁰Kidamwa bogwa lakasimwaisi tapwaroru baisa yoku ma Yaubadasi, e lakanigadasiga baisa natana yaubada nagilagala,

²¹yoku bogwa wala bukubani, paila yoku kunikoli makwaisina ma kiumsi oninamaisi.

²²Yam komwaidona makateki bakakaligasi paila goli yoku. Eivigakaimasi makawala yakamaisi sipi eiyosaimasi mwada bikatumataimasi.

²³Mwa! Guyau, kumamata! Avaka paila kummasisi? Kuvigimamalu kutokaia! Taga kupakaitulaimasi!

²⁴Avaka paila kusipepuni metoya baisa yakamaisi? Taga kulumwelavi kama mmayuyusi deli kama mwausi.

²⁵Yakamaisi kakapusisi watanawa deli kala mama uwomaisi. Kakanukwenusi wala opwaipwaia paila bogwa lakamamasi.

²⁶Kuma kupilasaimasi! Kukolaimasi paila uula m mitakwai!