Read Kilivila SAM 48 Bible Online

SAM 48 - Kilivila bible

SAM 48

¹Matauna Guyau saina tovakaigaga, e ola vilouveka da Yaubadasi ola koya kwebumaboma[116] ibodi bibani kala yakaula saina walakaiwa.

²Mapilana Saiyoni Yaubada la koya kwaiwonaku deli kweminabwaita. Giyouveka la valu iyomwasali valu watanawa komwaidona.

³Yaubada bogwa iyomitali baisa availa availa isisuaisi olumoulela makwaisina bolela kabilia ovilouveka kidamwa matauna wala si kabokwala.

⁴Gweguya ivigakaisi boda kwaitala e imaisi biyowaisi makwaina Koya Saiyoni.

⁵Mitaga avai tuta igisaisi makwaina, komwaidosi wala itutu ninasi. Komwaidosi wala ikokolasi e isakaulasi.

⁶E komwaidosi wala ibulukukoli deli itatatuvasi makawala vivila bogwa la tuta bivalulu,

⁷kaina makawala waga ikatuuvili utuyagila.

⁸Bogwa talagaisi avaka Yaubada bogwa leivagi, e baisa tuta bogwa tagisaisi olumoulela la vilouveka da Yaubadasi, matauna Guyau Topeuligaga. Matauna bikoli la valu tuta gala biwokuva.

⁹Mwa Yaubada! Olumoulela m Bwala Kwebumaboma kaluluwaisi m mitakwai.

¹⁰Tomota komwaidona ambaisa ambaisa iyakawolaimsi e bulogam ikalukubali ovalu watanawa komwaidona. Yoku kukwaraiwaga duwosisia.

¹¹Ibodi mina Saiyoni bimwasawasi! Yoku kusaiki karaiwaga duwosisia. Ibodi mina Yudia bimwasawasi osi valu.

¹²Yokomi Yaubada la tomota, kutavinaisi mapilana Saiyoni e kukwalauwaisi kala bawa bolela vatoi.

¹³Kuvitusaisi papa deli kumitakavataisi bolela kabilia. Mapaila baisa ibodi bukulukwaisi tubwa matubona igau bima,

¹⁴kawami, “Matauna Yaubada da Yaubadasi Tosivagasi, e matauna bivakadaidasi tuta tuta e gala wala biwokuva.”