Read Kilivila SAM 49 Bible Online

SAM 49 - Kilivila bible

SAM 49

¹Komwaidomi ka, kulagaisi baisa! Mina watanawa komwaidomi, kulegasi.

²Kulegasi, yokomi tovakaveka e deli goli tokikekita. E yokomi isim dimlemi, deli yokomi gala dimlemi, kulegasi.

³Bakaibigi mimilisi vavagi kala kateta mwau sainela. Balivali mabigasina bigala kabitam.

⁴Magigu bitaninamsaisi mimilisi bigivakalela valu. Ka, bawai gita e deli goli wosila bakatumiki makwaisina.

⁵Itoulaigusi tomitugaga, matausina idokaisi si guguwa bidubadu mwada kasi katumova, e ikamnumonaisi si veiguwa saina bidugaga. E matausina agu tilaula itoulaigusi, e bogwa laboda kabosilagi, mitaga yeigu gala wala bakokola.

⁷Gala gagabila taitala tomota bimapu la momova titoulela metoya ola guguwa. Gala gagabila bisaiki Yaubada avaka bibodi mapula la momova.

⁸Paila taitala tomota la momova mapula saina kwevakaigaga. Gala gagabila tomota bisaili avai mapu

⁹mwada bikaliduboli kala laka, e bisisuga tomomova wala tuta gala biwokuva.

¹⁰Komwaidodasi tanikolaisi kidamwa tokabitam bikaligasi, e tuvaila tobubeikam deli toninagowa, e, komwaidodasi goli bitakaligalabasi. Da guguwasi komwaidona bitaligaimwaisi, e tubudoiasi bikeulasi kasi bigukeya.

¹¹Tokwaliga kasi laka baisa si viloukeya e bisivagasisi baisa. Baisa goli bisisuaisi tuta gala biwokuva, kalubikoya goli omitibogwa isim si pwaipwaia.

¹²Kaina taitala tomota saina todabala, mitaga baisa gala wala bikoli la momova matauna. Paila bogwa bikaliga wala, makawala goli avai mauna avai mauna.

¹³Ka, kugisaisi avaka bikaloubusi baisa matausina availa availa idubumaisi titoulesi wala. E kugisaisi ammakawala bibodaisi kasi mwau matausina availa availa ininaki luposi paila si guguwa bidubadu.

¹⁴Paila kasi kamwaga bikaligasi makawala sipi, e taitala yagala Kaliga matauna kasi toyamata. Uwosi saina nanakwa bikaligeyai, paila bogwa bisilavaisi si valu e bilokaiasi Tuma. E tomitukwaibwaila bitomgwagasi odubasi matausina.

¹⁵Mitaga Yaubada bogwa bikolaigu. Matauna bikatumovaigu e gala baboda kaliga kala peula.

¹⁶Kidamwa taitala tomota bibani la guguwa bidubadu, e kaina bikatumkulovi la guguwa bibidubadu - e taga bukunokubukubusi.

¹⁷Ka, avai tuta bikaliga, gala gagabila guguwa bisoguguwi bilau mapilana Tuma. Makwaisina gala wala deli bilau tomata osi valu.

¹⁸Ilagoli taitala ininaki lopola paila la momova odabala pwaipwaia, e deli ibani kala yakaula paila uula toliguguwa bidubadu matauna,

¹⁹ka, avai tuta bikaliga, bogwa bilokaia ambaisa komwaidosi tubula ilobogwasi, mapilana valu kala dudubila gala biwokuva, bikanigaga wala.

²⁰Kaina taitala tomota saina todabala, mitaga baisa gala wala bikoli la momova matauna. Paila bogwa bikaliga wala, makawala goli avai mauna avai mauna.