Read Kilivila SAM 5 Bible Online

SAM 5 - Kilivila bible

SAM 5

¹Mwa Guyau! Kunakaigali ulo bigatona, e kulagi ulo tiliawai.

²Mwa! Guyau ulo Yaubada, kunakaigali ulo dou paila pilasi. Mwa Guyau! Anigadaim,

³kaukwau makwaina kulagi kaigagu. Tutala kalasia iyuwoula anigada baisa yoku, e atulotula wala paila mapula.

⁴Yoku Yaubada gala wala kuyebwaili sula, e gala kutagwala mitugaga bisisu omatam.

⁵Yoku gala magim bukugisi matausina ninasi walakaiwa, e gala magim matausina tomitugaga.

⁶Yoku kukwatumtuwoli komwaidosi toubuwabu e kukwaluwou matausina togigasisi deli tokatuduvidavi.

⁷Yeigu gagabila wala basuvi om bwala e batapwaroru om Bwala Kwebumaboma, e bakavagina baisa yoku deli ulo taimamila, paila wala m yebwaili saina vakaigaga.

⁸Mwa Guyau! Saina bidugaga agu tilaula! Kuvakadaigu avaka nanom bavagi. Kuvigaki m keda bimigileu baisa yeigu e igagabila babokuli.

⁹Avaka agu tilaula bilivalasi, gala wala avai tuta bitadubumi. Matausina magisi wala bikodadaimisi. Si biga komwaidona wala kaitayela nona deli madagi, mitaga ikasewoki wala kabosilagi.

¹⁰Mwa Yaubada! Kukwamogi deli kumipuki matausina. Ibodi avaka ikikeiwalaisi bivigaki wala si kabosilagi. Kubokavili bisunapulasi metoya omatam, paila uula saina bidubadu si mitugaga deli si kosomapu baisa yoku.

¹¹Mitaga availa availa matausina ibanaisi kabokwala baisa yoku bimwasawasi. Matausina tuta komwaidona ibodi biusiwosisi deli mwasawa. Bukuyamati matausina availa availa iyebwailimsi. Matausina ibanaisi mwasawa mokwita paila uula wala yoku.

¹²Yoku Guyau kumitukwaii matausina availa availa ikabikuwolaimsi, e m yebwaili bikoli matausina makawala vayoula.