Read Kilivila SAM 50 Bible Online

SAM 50 - Kilivila bible

SAM 50

¹Guyau matauna Yaubada Topeuligaga ililivala. Matauna idoudou baisa viloumwaidona valu watanawa metoya opilibomatu e bila opilikwaibwaga.

²Yaubada visigala ititapi metoya mapilana Saiyoni,[117] makwaina vilouveka kala gigisa saina bwainigaga.

³Da Yaubadasi igau bima, mitaga gala kwaimanum. Omatala bisisu kova kovalululu, e utuyagila bitavini bitapatu matauna.

⁴Matauna bidou mina labuma deli mina watanawa, matausina kala tosola, paila bigisaisi matauna biyakali la tomota.

⁵Matauna ikaibiga kawala, “Kumiakaigusi ulo tomota tokimadagi, matausinaga bogwa lakabutu metoya osi lula.”

⁶E mina labuma ikamitulaisi Yaubada matauna tomitukwaibwaila, e matoulela goli toyakala.

⁷Yaubada kawala, “Ulo tomota kunakaigalaigusi, e balivala. Yeigu igau bakamitilakaimi, yokomi mina Isireli. Yeigu Yaubada, mi Yaubada goli.

⁸Yeigu gala akamitilakaimi paila mi lula, deli makwaisina lula kwegubugabu tuta komwaidona lokumiakaigusi.

⁹Mitaga gala magigu bulumakau nammwala metoya omi yokanikani, kaina gota metoya omi yawa.

¹⁰Komwaidona mauna olawodila baisa ulo vavagi wala, deli goli minasina bulutuvalu eitotusi wala odubasi lakatuluwovila koya.

¹¹Komwaidona mauna nayoyowa baisa ulo vavagi, e deli goli komwaidona mauna namomova ambaisa ambaisa.

¹²“Kidamwa yeigu bakamolu, gala ibodi balukwaimi, paila valu watanawa deli komwaidona avaka avaka olumoulela baisa ulo vavagi.

¹³Ki, kudokaisi bakoma vilionesi bulumakau nammwala kaina bamom buyavisi gota ke?

¹⁴Ibodi nokagutoki bukuvigakaisi mi lula baisa yeigu Yaubada, deli bukusakaigusi yeigu Topeuligaga komwaidona avaka bogwa lokukwatotilasi mwada bukusakaigusi.

¹⁵Kidamwa avai tuta bukubodasi mwau, kudousi baisa yeigu, e yeigu bakatumovaimi, e yokomiga bukuyakawolaigusi.”

¹⁶Mitaga Yaubada iluki mina watanawa kawala, “Ki, avaka uula bukulakasaisi ulo katuloluta? Deli avaka uula bukulivalasi paila ulo kabutu?[118]

¹⁷Yokomi gala kutagwalasi kidamwa yeigu bakiduwosisiaimi, e yokomi kupakaisi makwaisina ulo karaiwaga.

¹⁸Yokomi kugisaisi wala matausina touveilau e kukwalubailisi, e tuvaila kutitoulalasi osi deili tokakailasi.

¹⁹“Yokomi tuta komwaidona kuninanamsasi wala paila bukubigigagasi. E tuvaila gala avai tuta bukuvaiwasisi sopa.

²⁰Yokomi tuta komwaidona kutitabinakaisi wala budamia deli tuwamia, e tuvaila kunainevisi wala kasi pakula matausina.

²¹Yokomi bogwa lokuuvagaisi komwaidona vavagi makwaisina, e yeigula gala wala avaka alivala. Mapaila kudokaisi wala mwada yeigu makawala wala yokomi. Mitaga tuta baisa lakakamitilakaimi e laiyomitali vavagi makwaisina baisa yokomi.

²²“Kulagaigusi availa availa yokomi tokatukubona. Kidamwaga gala, yeigu bakatudoumwaimi, e gala wala availa tuvaila bikatumovaimi.

²³Matauna availa inokagutoki baisa yeigu, ikamiabaigu, e yeigu mokwita wala bakatumovi komwaidosi matausina availa availa ikabikuwolaigusi.”