Read Kilivila SAM 51 Bible Online

SAM 51 - Kilivila bible

SAM 51

¹Mwa Yaubada! Bukunokapisaigu, paila yoku saina tomitakwai. Metoya om nokapisi kwaiveka bukuligaiwa komwaidona ulo mitugaga.

²Bukuwinisau ulo mitugaga komwaidona e bukukwatumigileuwaigu metoya ogu mitugaga!

³Bogwa lavitoki tolosila agu pakula. e tuta tuta aninamsi makwaisina ulo mitugaga.

⁴Bogwa lasula baisa yoku, kammwaleta wala yoku, e lavagi baisa avaka yoku kudoki mitugaga. E mauula kuyakalaigu, e m yakala baisa duwosisia. Lokukwamogaigu, e ibodi goli bukuvagi baisa.

⁵Yeigu tomitugaga metoya ogu tuta kaloubusi. Ka, metoya ogu yam kaloubusi yeigu asulosula goli.

⁶Bubunela kamokwita deli biga mokwita, baisa goli magim. Ibodi bitapuloki nanogu m kwabitam.

⁷Kukwau ulo mitugaga e bogwa bamigileu. Kuvakakaiyaigu e yeigu bamigileu tomwaidogu.

⁸Mokwita yoku lokuyomami wowogu deli kukimkumkwaigu. mitaga kutagwala balagi butula mwasawa e yeigu bogwa bamwasawa tuvaila.

⁹Taga bukugisi ulo mitugaga, e bukuligaiwa ulo mitugaga komwaidona.

¹⁰Mwa Yaubada! Bukububuli nona migileu olumoulegu, e bukuvigakaigu batovau deli bakatalova.

¹¹Gala bukuyabaigu metoya omatam, e gala bukukwau m baloma tobumaboma[119] metoya baisa yeigu.

¹²Bukutagwala babani tuvaila mwasawa metoya om kwatumova, e kupilasaigu kidamwa batugwalaigu tomwaidogu e bakabikuwolaim goli.

¹³E mapaila bavituloki makwaisina m kwaraiwaga baisa tomitugaga, e bininavilasi goli baisa yoku.

¹⁴Mwa Guyau! Kukoli ulo momova, e bukukwatumovaigu, e deli nanogu kala mwamwasila bakamituli m mitakwai.

¹⁵E Guyau, kuulaim wodogu e bogwa bayakawolaim.

¹⁶Yoku gala wala magim lula, kaina goli bagabu lula baisa yoku. Lula kwegubugabu gala wala biyomwasali nanom.

¹⁷Mwa Yaubada! Nanogu kala manum baisa lavigaki ulo lula baisa yoku. Gala bukupaiki avai toninavila kidamwa deli nanola manum biwokaiam.

¹⁸Mwa Yaubada! Bukumitukwaii mapilana Saiyoni, e bukupilasi makwaina valu. Kukwaliivau kalila mapilana Yerusalem.

¹⁹E oluvi bakalulasi lulatoula deli lula kwegubugabu, e baisa goli biyomwasali nanom. E bakagabwaisi bulumakau nammwala om kwabolula.