Read Kilivila SAM 56 Bible Online

SAM 56 - Kilivila bible

SAM 56

¹Mwa Yaubada! Kunokapisaigu, paila uula yeigu bogwa iwawaigusi. Agu tilaula tuta komwaidona ilamidadaigusi.

²Yam kwemwaidona agu tilaula iwawaigusi wala. Matausina saina kasi tobidubadu iwawaigusi.

³Mwa! Guyau Topeuligaga, avai tuta bakokola, yoku wala badubumaim.

⁴Yeigu adubumi wala Yaubada e gala wala bakokola. Ayakawoli matauna paila avaka bogwa eikatotila. Ki, avakaga taitala tomota bivagi baisa yeigu?

⁵Agu tilaula iyomwauwaigusi wala yam kwemwaidona. Tuta komwaidona ininanamsasi ammakawala biyogagaigusi!

⁶Isigugulasi osi kabosupepuni e igigisaisi avaka avaka lauvagi, e ipipikwakusi paila bikatumataigusi.

⁷Mwa Yaubada! Kumipuki matausina paila si mitugaga, e kukwalisau matausina metoya om gibuluwa.

⁸Yoku kunikoli avaka agu mwau, e kunikoli kala vakaila mitilagigu - ki, makwaisina vavagi bogwa lokugini om buki,[126] ke?

⁹Yam makwaina badou baisa yoku, e agu tilaula bitovilasi bikeiitasi. Bogwa lanikoli baisa, ka - Yaubada bogwa ipiaigu,

¹⁰matauwena goli Guyau, e ayakawoli la biga katotila.

¹¹Adubumi wala matauna, e gala wala bakokola. Ki, avakaga taitala tomota bivagi baisa yeigu?

¹²Mwa Yaubada! Bogwa wala basemakavi baisa yoku avaka bogwa lakatotila. Ulo nokagutoki bavigaki ulo semakavi baisa yoku.

¹³Paila uula yoku kukolaigu metoya okaliga, e deli gala kutagwala kidamwa bamama. E baisa uula yeigu aliloula omatala Yaubada, e aliloula goli olumalama makwaina ititapi tommomova.