Read Kilivila SAM 60 Bible Online

SAM 60 - Kilivila bible

SAM 60

¹Mwa Yaubada! Yoku bogwa lokupakaimasi, deli bogwa lokukwalisauwaimasi. Bogwa lokugibuluwaimasi. Mitaga baisa tuta ibodi bukutovilakaimasi.

²Yoku bogwa kuvagi valu imotatina, e yoku bogwa kutavi ikapogega. Baisa tuta kutuvi kala tatavi, paila bogwa eilakalova.

³Bogwa lokusaiki m tomota kasi mmayuyu sainela. Kavagougweunasi makawala bogwa kamommatasi.

⁴Yoku bogwa lokukwatumitilaki availa availa matausina ikukolaimsi, e matausina gagabila bisakauligilaisi kasi kamwaga.

⁵Kukolaimasi metoya om peula. Kumapu ma nigadasi, e kuma kukolaimasi yakamaisi m tomota mina mbwailim.

⁶Metoya ola kabosisu kwebumaboma Yaubada eilivala kawala, “Bogwa batomgwaga, e basigali mapilana Sekem deli bavili mapilana Sukota Itayatilela, basaiki ulo tomota.

⁷Mapilana Giliadi baisa ulo vavagi, e makawala goli Manasa.[133] Mapilana Epereim lavigaki agu kulupewa, e deli mapilana Yuda lavigaki kabutuvitusila ulo guyau.

⁸Mitaga mapilana Mowabi bavigaki agu kakwaiwosi, e basaili kaikegu baisa mapilana Edom, e baisa kabutuvitusila ulo yayosa. Ki, mina Pilisitia eidokaisi mwada bigougovasi paila bitomgwagasi odabagu?”

⁹Mwa Yaubada! Availaga gagabila bivisuyaigu olumoulela vilouveka makwaina saina kwaipeula? Ki, availaga bivakadaigu bilauwaigu bala mapilana Edom?

¹⁰Ki, bogwa kupakaimasi mokwita? Ki, gala bukuvakwabwaimasi deli ma tokwabiliasi?

¹¹Kupilasaimasi metoya oyumasi kama tilaulasi, paila tomota si pilasi gala wala dimlela.

¹²Kidamwa Yaubada deli yakidasi, bogwa wala bitakalisewasi, e matauna bikalisau kada tilaulasi.