Read Kilivila SAM 65 Bible Online

SAM 65 - Kilivila bible

SAM 65

¹Mwa Yaubada! Ibodaimasi bakayakawolaimsi mapilana Saiyoni,[140] deli bakavigakaimsi makawala ma katotilasi,

²paila yoku kumapu ma nigadasi. Bidubadu mina watanawa biwokaiamsi,

³paila uula si mitugaga matausina. Kama pakulasi wala eiyomamaimasi. Mitaga yoku kuligaiwa ma mitugagasi.

⁴Matausina availa availa bogwa lokunagi imwasawasi, paila kusividuli matausina om Bwala Kwebumaboma.[141] Yakamaisi kakamsi kakomatasi kalagila m bwala, makwaisina vavagi bwaina metoya om Bwala Kwebumaboma.

⁵Yoku lokuvigaki katomgwagasi, e makawala wala kumapu ma nigadasi, e kuvagi vavagi saina kabokatubau paila mwada bukukwatumovaimasi. Mina watanawa avai migila avai migila idubumaimsi.

⁶Lokuvitau koya okabasi metoya om peula, e makawala kuyomitali m peuligaga.

⁷Bolita kala kaipolu sainela kuvigaki biniwavila e butula kaisai bimanum. Tomota si mowai kuyominum.

⁸Valu valu komwaidona itutu ninasi sainela paila vavagi makwaisina kwevakaveka avaka lokuvagi. Igisaisi avaka lokuvagi e igovasi deli mwasawa metoya pilatala valu bila piliyuwela.

⁹Kuvakawoli valu watanawa e mapaila kuwitali kuna e kuvigaki bikabinai sainela. Kusaiki sopi bidubadu e waya komwaidona ikasewasi e kusaiki valu watanawa yagogu paila bagula. E kuuvagi baisa makawala -

¹⁰kuwitali kuna kunoveka ambaisa bogwa eisapwaisi e sopi isuvi iyopututu. Pwaipwaia bimanum metoya kunosigosigula e bivigaki yagogu bitaginapulasi.

¹¹Ka, ina kwaitala luvabwaila kabanaisi metoya om bobwailila. Ambaisa ambaisa bukula kuvakawoli, matausina iluvabwailasi.

¹²Rigaba ikasewoki avaka avaka e kawailuwa kasi luvabwaila goli.

¹³Sipi saina bidugaga osaivau. Oitayatila ikasewa bigulela witi. Vavagi komwaidona deli si mwasawa igougovasi iusiwosisi.