Read Kilivila SAM 66 Bible Online

SAM 66 - Kilivila bible

SAM 66

¹Komwaidomi tomota, kuyakawolaisi Yaubada omi gova deli mwasawa!

²Kuwosisi kala yakaula matauna Toguyugwayu, e kukwaigalaisi deli mi yakaula baisa matauna.

³Kulivalasi baisa Yaubada, kawami, “Isa bwainigaga komwaidona vavagi lokuuvagi! M peula saina vakaigaga, mapaila kam tilaula ikukolaimsi e ikululusi ikavaginasi baisa yoku.

⁴Komwaidosi mina watanawa ititapwarorusi baisa yoku. Iusiwosisi kam yakaula e ikavisaimsi goli.”

⁵Kumaisi kugisaisi avaka Yaubada bogwa leivagi. Matauna iuvagi vavagi kabokatubau oluwalaisi tomota.

⁶Matauna bogwa ivigaki bolita imili yabala, e tubudoiasi iluvapelasi wa waya okaikesi wala. Mapaila metoya mapilana tamwasawasi uula avaka bogwa leivagi.

⁷Matauna la karaiwaga kwepeuligaga gala biwokuva, e imitakavati boda ituwoli ituwoli. Taga availa bikosomapu matauna.

⁸Yokomi komwaidomi boda ituwoli ituwoli, kuyakawolaisi ma Yaubadasi, e kukwaigivakavekasi komwaidosi bilegasi.

⁹Matauna eiyomovaidasi mauula tasisuaisi bwaina, e gala bitugwalaidasi kidamwa bitakapusisi.

¹⁰Mwa Yaubada! Yoku bogwa lokuwakolaimasi. Makawala siliba bikatumigileuwaisi metoya wa kova, e makawala goli lokuwakolaimasi.

¹¹Yoku lokutagwala bakawaisi wa sikula, deli lokusaili koni mwau otupwamaisi.

¹²Yoku lokukwasali kama tilaulasi bivakikilaimasi, e yakamaisi kasuwalaiyaisi kova deli dadoya.[142] Mitaga tuta baisa bogwa lokumaiyaimasi oviluwela kabokwala.

¹³Bamai ulo lula kwegubugabu om bwala.[143] E balula baisa yoku avaka bogwa lakatotila.

¹⁴Baisa avaka lalivala mwada basakaim tutala laboda mwau, e bogwa goli basakaim.

¹⁵Sipi bavigaki lula bigabwaisi okabolula, e balulaga bulumakau nammwala deli gota, e mseula bila ikalivi gawata.

¹⁶Komwaidomi availa availa kutemmalaisi Yaubada, kumaisi kunakaigalaigusi, e balukwaimi avaka bogwa eivagi paila yeigu.

¹⁷Ladou baisa matauna paila pilasi, e layakawoli matauna metoya wa wosi.

¹⁸Kidamwa bakiwoli ulo mitugaga, Guyau gala wala binakaigalaigu.

¹⁹Mitaga Yaubada mokwitatoula wala bogwa eilagaigu. Matauna bogwa einakaigali ulo nigada.

²⁰Mapaila ayakawoli Yaubada, paila uula gala ikoulovi ulo nigada. kaina iyusi la mitakwai metoya baisa yeigu.