Read Kilivila SAM 68 Bible Online

SAM 68 - Kilivila bible

SAM 68

¹Yaubada bitokaia e bibutugigai kala tilaula. Ikalisau matausina availa availa ikoulovaisi matauna e isakaulasi.

²Makawala mseu eiyuvisau, e makawala goli matauna bibokavili matausina. Makawala nawota posala bivakasosu wa kova, e makawala goli tomitugaga idoumsi omatala Yaubada.

³Mitaga tomitukwaibwaila imwasawasi deli ikaimwanasi omatala. Matausina deli si mwasawa igougovasi.

⁴Kuwosisi baisa Yaubada, kuwosisi kala yakaula matauna. Kukwatubiasaisi la keda matauna eisisila olowalowa. Matauna yagala Guyau. Ibodi bukumwasawasi omatala matauna!

⁵Yaubada matauna isisu ola Bwala Kwebumaboma, e iuvauli weilova deli ikoli kwabuya.

⁶Matauna isaiki togumalawa si kabosisu, deli itaneku tokatupipi, e ilau deli si mwasawa. Mitaga tokosomapu ibodi bisisuaisi mapilana valu vilouwokuva.

⁷Mwa Yaubada! Avai tuta lokukugwai m tomota,[144] e lokuvapelasi oviloupakala,

⁸pwaipwaia imotatina deli kuna ikapusi metoya wa labuma, paila Guyoula Sinai[145] bogwa leima, e bogwa leima matauna mina Isireli si Yaubada.

⁹Yoku kukwaraiwogi kuna bikunokuna wala, paila bukuvigivau m pwaipwaia bikabinai.

¹⁰E m tomota imili valusi baisa, e metoya om bobwailila kusaiki avaka bibodi tonamakava.

¹¹Guyau ilivala avaka la karaiwaga, mapaila bidubadu vivila ikititeilisi biga, kawasi,

¹²“Ka, gweguya deli si tokwabilia bogwa eisisakaulasi bilosi!” Vivila ovalu ivilaisi si guguwa avaka eilebwaisi okabilia.

¹³Ivilaisi bubuna minasina eibubulaisi silibawokuva wala, e pinupanesi goulawokuva wala ivivivilasi. (Ki, avaka paimi mimilimi yokomi kusibwaigasi okasi kali sipi oyamla kabilia ke?)

¹⁴Avai tuta Yaubada Topeuligaga ibutugigai gweguya odabala makwaina Koya Salimoni, matauna ivigaki numla kwekulokula ididebwali baisa.

¹⁵O ina kwevakaigaga Koya Basani, makwaina dabala saina bidubadu.

¹⁶Mwa! Yoku Koya Basani, avaka paila metoya odubiliwotam, e kukululukiga deli kuyosokani koya makwaina Yaubada bogwa einagi[146] bimili valu? Ka, Guyau bimili valu baisa, tuta gala biwokuva.

¹⁷Guyau ibusi metoya makwaina Sinai e ila oviloubumaboma, deli lakatuluwovila la waga kaibibiu saina kaipapeula.

¹⁸Matauna ilaguva ila walakaiwa, e deli goli bidubadu tokatupipi ilau, matauna ibani bobwailila metoya baisa tomota tokosomapu. Ka, Guyau Yaubada bimili valu baisa.

¹⁹Tayakawolaisi Guyau, paila matauna ikokeula da konisi yam kwaitala kwaitala. Yaubada wala matauna kada tokwatumovasi.

²⁰Da Yaubadasi matauna Yaubada Tokwatumova. Matauna goli Guyau da Guyausi, bikolaidasi metoya okaliga.

²¹Mokwita wala Yaubada bikatuvi pwanetasi kala tilaula, availa availa matausina tokwaliyeia mitugaga.

²²Guyau bogwa eikaibiga kawala, “Ka, yeigu bakaimilivau kami tilaula metoya mapilana Basani, e bakaimilivau matausina metoya omilaveta olumoulela tukutaku,

²³mapaila yokomi ibodaimi bukuuvasilasi wala obuyavisi, e deli mi kaukwa binumonomsaisi wala avaka bibodi kasi lumkola minasina.”

²⁴Mwa Yaubada! M vautuutu paila lokutomgwaga komwaidosi wala igigisaisi, e Yaubada ulo Guyau ivautuutu bila ola bwala kwebumaboma.

²⁵Mapaila tousiwosi itomatalasi, e otuboulosi tokasosau, e vivila itowalasi ikikimgolasi sasani, kawasi,

²⁶“Yokomi Yaubada la tomota, kuyakawolaisi matauna omi sigugula. Komwaidomi yokomi tubula Yekobe, kuyakawolaisi Guyau!”

²⁷Beniamina[147] makwaina dala kwekekita bikugwasi, e otuboulosi tokugwala Yuda deli si boda, e bivabodasinim tokugwala Sebuloni deli Napitalai.

²⁸Mwa Yaubada! Kuyomitali m peula, peula makwaina lokuuwotetila paila yakamaisi

²⁹metoya om Bwala Kwebumaboma mapilana Yerusalem, ambaisa gweguya eimmiakaimsi si bobwailila.

³⁰Kukwamitilaki mina Itipita, matausina makawala bolodila okivikivi. Kukwamitilaki boda ituwoli ituwoli, matausina makawala yuwotala bulumakau nammwala deli litusia, tatoula wala komwaidosi bikavaginasi deli bisemakavaisi si siliba baisa yoku. E kubutugigai matausina mbwailisi kabilia.

³¹Matausina udosi mina Itipita bogwa bimaisi, e mina Sudani bogwa biyosalaisi yumasi deli si nigada baisa Yaubada.

³²Kabokwaraiwaga ambaisa ambaisa ovalu watanawa, kuwosisi baisa Yaubada. Kuwosisi yakaula baisa Guyau,

³³matauna mesisiki wa labuma, makwainaga labuma kwaibogwa. Ka, kunakaigalaisi matauna eiukuwakula metoya okaigala eiwayabolu.

³⁴Kukwamitulaisi Yaubada la peuligaga. Matauna la guyau bogwa eikubali mapilana Isireli, e la peula bogwa leila wa labuma.

³⁵Waa! Kabotulaula mokwita tutala Yaubada bima metoya ola Bwala Kwebumaboma, matauna mina Isireli si Yaubada! Matauna ikatupewoli la tomota si peula. Kala yakaula Yaubada!