Read Kilivila SAM 69 Bible Online

SAM 69 - Kilivila bible

SAM 69

¹Mwa! Yaubada, kukolaigu. Agu tom wa sopi[148] bogwa eivakana okaiyogu.

²Asisalili wa dumia saina sunusonu, e gala ambaisa babani kabakaiwa. Akakaya obolita, e kaisai makateki bikipinaigu bamom.

³Asomata wala doudou paila pilasi, e bogwa eikivi kaigagu. Lamitibilibili anainevi pilasi, e matagu bogwa eibiliuya.

⁴Matausina eivigimakavaisi wala eivigakaigusi tokukolosi, kasi bawa ikalisau kulugu kala bawa. Agu tilaula itabinakaigusi. Saina topapeula matausina, e mwada bikatumataigusi. Ikaiyouligusi e akaimali guguwa avaka gala aveilau.

⁵Mwa Yaubada! Ulo mitugaga gala akatupwani metoya omatam. Yoku kunikolibogwi ammakawala ulo nagowa.

⁶Mwa Guyau! Giyouveka Topeuligaga yoku, gala bukutagwala bayomsili matausina availa availa eidubumaimsi. Mwa! Yoku mina Isireli si Yaubada, gala bukutagwala bavigaki bimmosilasi matausina ititapwarorusi baisa yoku.

⁷Tomota ibigigagaigusi e saina iyomsilaigusi, e atagwala aboda mwau makwaisina paila uula yeigu taitala m tomota.

⁸Tuwagwa e budagwa idokaigusi tomitawasi, e veyagwa idokaigusi togilagala yeigu.

⁹Ulo ninatotila paila kala yamata m Bwala Kwebumaboma ivigaki makawala kova ilululu olopogu. Tomota ibigigagaimsi, e yeigu alumkoli kala mwau.

¹⁰Apusoposuma mwada bivigaki nanogu kala manum, e tomota ibigigagaigusi.

¹¹Asisikam agu koula, e igigilaigusi.

¹²Obikubaku ililivalaigusi, e matausina tomom kaibotutu ibutukwaigusi wosi.

¹³E Guyau, mayeigu ka - yeigu banigada baisa yoku. Mwa Yaubada! Bukumapwaigu avai tuta bukunagi. Ibodi bukumapu ulo nigada, paila uula m yebwaili saina kwaiveka, e paila uula kuuvagi makawala m biga katotila paila bukukoli tomota.

¹⁴Bukukolaigu mwada gala bavasonu wa dumia. Bukukolaigu kidamwa gala basilagi metoya agu tilaula e metoya saina bolita.

¹⁵Taga bukutagwala dadoya bikubolaigu, kaina bakanopula otulubwabwau, kainaga basalili wa laka.

¹⁶Mwa Guyau! Yoku m mitakwai saina bwaina. Bukumapu ulo nigada, e metoya om nokapisi bukutovila baisa yeigu.

¹⁷Taga kusipepuni ambaisa yeigu m towotetila gala gagabila bagisaim. Paila yeigu laboda mwau sainela. Mwa Guyau! Kuvitakaulokaigu.

¹⁸Kumakaiagu, bukukolaigu. Bukukolaigu metoya matausina agu tilaula.

¹⁹Yoku kunikolibogwi ammakawala eibigigagaigusi. Bogwa eiyomsilaigusi e eikaluwouwaigusi goli. Yoku kugigisi agu tilaula komwaidosi.

²⁰Si bigigaga iyomwau nanogu, e bogwa lasim pikwaku komwaidona. Magigu availa kamataiyu bivagi kalogu, mitaga gala availa bipilasaigu. Magigu availa bivisimolaigu, mitaga gala wala availa abani.

²¹Agu molu, mitaga ivakomaigusi napwa. E agu daka, mitaga ivimomwaigusi waini pwayuyu.

²²Ka, ibodi kasi paka bivigaki si kabosilagi, e si kamkwam kwebumaboma bivigaki si kabokwapusi.

²³Bukuvigaki matausina bikausi, deli kaipousi bitumakuwa tuta komwaidona.

²⁴Bukugibuluwi matausina, e om ninamwau bukubokavili bukuyosi matausina.

²⁵Ibodi si kabosikaiwa biviloububu wala, e komwaidosi osi buliyoyova bidoumlabasi wala.

²⁶Ilamidadaisi availa availa yoku lokumipuki, e ibigitonisi kasi mmayuyu matausina availa availa yoku lokukwatubuyavi.

²⁷Ibodi si mitugaga kala luluwai bikanuvagasi omatam. Taga kutagwala bisim kasi vilavila olumoulela m kwatumova.

²⁸Ibodi bukukodidaimi yagasi metoya mapilana buki[149] isim yagasi tommomova, e gala goli bukugini yagasi deli mabudona m tomota.

²⁹Mitaga yeigu laboda saina mmayuyu e asim wala pikwaku. Mwa Yaubada! Bukulupaigu bukukolaigu.

³⁰Bawosi Yaubada kala yakaula, e banokagutoki baisa matauna, e makawala bakamituli matauna saina Tovakaigaga.

³¹Yakaula makwaina biyomwasali Guyau e bikalisau bulumakau kala gabu wa lula. Kaina ibodi bitagabu natana bulumakau namwala naveka, mitaga wosila yakaula biyomwasali nanola sainela.

³²Matausina eibodasi lamadada bigisaisi baisa e bimwasawasi. Vavagi makwaina bikatupewoli ninasi matausina availa availa ititapwarorusi baisa Yaubada.

³³Guyau ililagi matausina availa availa eibodasi mwau, e gala wala bilumwelavi matausina la tomota wa bwala katupipi.

³⁴Eei! Yoku valu walakaiwa, e yoku valu watanawa, bukuyakawolaisi Yaubada, e yoku bolita deli komwaidona maunem, kuyakaulasi.

³⁵Yaubada bikoli mapilana Yerusalem, e bikaliivau viluwesi Yuda. Yaubada la tomota bisisuaisi baisa, deli bisigagasi mapilana valu.

³⁶La towotetila tubusia biyosisi kasi bigukeya, e komwaidosi availa availa idokaisi matauna tombwailisi bogwa bisigagasi baisa.