Read Kilivila SAM 71 Bible Online

SAM 71 - Kilivila bible

SAM 71

¹Mwa Guyau! Bogwa lamakaiam paila bukukolaigu. Gala avai tuta bukutugwalaigu mwada bamama!

²Kupilasaigu deli kukolaigu, paila yoku saina tomitukwaibwaila. Kunakaigalaigu e kukwatumovaigu!

³Bukuvigakaim ulo kabokwala bwaina, deli makawala bolela kabilia kwaipeula paila bukukolaigu. Yoku wala agu tokwala deli agu taboda.

⁴Mwa! Ulo Yaubada, kukolaigu metoya oyumasi tomitugaga, metoya osi peula matausina tovakatutuki deli tovagisi gaga.

⁵Mwa Guyau! Lapikwakwaim goli. Igau otubovaugu e leima lagaila, yeigu bogwa wala ladubumaim.

⁶Ogu tuta komwaidona lakakana baisa wala yoku. Tutala yam makwaina lakaloubusi leima lagaila, yoku bogwa kutabodaigu. E tuta komwaidona bayakawolaim wala.

⁷Ulo bubunela bivigaki si kabogigisa[150] tomota bidubadu, uula wala yoku agu taboda topeula.

⁸Yam komwaidona ayakawolaim, e akamituli m guyugwayu.

⁹Mapaila tuta baisa taga bukupakaigu paila uula bogwa latomoya, e gala bukusilavaigu paila uula bogwa lakabikaitukwa.

¹⁰Agu tilaula ililivalasi deli ikeiwalaigusi, magisi wala bikatumataigusi.

¹¹Mapaila ikaibigasi kawasi, “Yaubada bogwa eisilavi matauna, e ibodi wala bitalokaiasi matauna e bitayosisi, paila gala wala availa bikoli matauna.”

¹²Mwa Yaubada! Taga kusikaduwonaku metoya baisa yeigu. Ulo Yaubada, nani kuma kupilasaigu!

¹³Ibodi availa availa matausina mwada biwaigusi bimamasi deli bidoumsi. Ibodi availa availa matausina mwada biyomiyuyaigusi biuliki wala kasi mmosila.

¹⁴Tuta komwaidona apikwakwaim goli, e tuta tuta ulo yakaula bakatumkulovi wala.

¹⁵Bakamituli wala m bobwailila, e yam kwemwaidona balilivali wala m kwatumova, ilagoli ulo kateta pikekita wala.

¹⁶Guyau Yaubada, bayakawoli wala m peula, e bakamituli m bobwailila, e kalamwaleta wala m bobwailila.

¹⁷Yoku wala lokuvitulokaigu igau otubovaugu e leima lagaila, e yam lagaila asetuwoli alilivala paila vavagi makwaisina kabokatubau lokuuvagi.

¹⁸E tuta baisa bogwa latomoya deli bogwa lakasousou. Mwa Yaubada! Taga kusilavaigu! Kusikailigu wala e yeigu bakakamituli wala m peuligaga baisa komwaidona tubwa matubosina igau bimaisi.

¹⁹O Yaubada, m mitukwaibwaila ila isakaila gawata. Yoku bogwa lokuvagi vavagi siligaga, e gala wala availa makawala yoku.

²⁰Yoku bogwa lokusakaigu agu mwau deli agu mmayuyu, mitaga igau bukukwaimilivau ulo peula. Yoku goli bukukwaliduboli agu laka.

²¹Yoku bogwa bukuvasiganaigu gala makawala omitibogwa, e yoku goli bukuvisimolaigu.

²²Ulo Yaubada, yeigu bogwala eimati bayakawolaim metoya wa gita. Bayakawoli m kimadagi, e ogu gita yeigu bawawai deli wosila tapwaroru baisa yoku, yoku goli mina Isireli si Tobumaboma.

²³Yeigu bagougova deli ulo mwasawa tutala awawai gita paila yoku, e tomwaidogu goli bawosi, paila yoku bogwa lokukolaigu.

²⁴Yeigu balilivala wala paila m mitukwaibwaila yam kwemwaidona, paila uula matausina availa availa mwada biyogagaigusi bogwa goli eimamasi deli eimmosilasi.