Read Kilivila SAM 73 Bible Online

SAM 73 - Kilivila bible

SAM 73

¹Mokwita goli Yaubada imitukwaibwaili mina Isireli, e baisa matausina ninasi migileu wala.

²Mitaga ka - yeigu ulo ninayuwa wala makateki bivakapusiaigu, e makateki goli ulo dubumi biwokuva,

³paila tutala agisi tomitugaga eibanaisi si guguwa saina bidubadu, yeigu apugipogi wala baisa matausina ninasi walakaiwa.

⁴Matausina gala ibudobodasi mmayuyu, e topapeula matausina, gala katoula.

⁵Gala bilumkolaisi mmayuyu makawala tomota ituwoli ilumkolaisi, e gala ibudobodasi vavagi mwau makawala ituwoli tomota ibudobodasi.

⁶E mapaila si kamnomwana ivigakaisi kasi katububula, makawala soulava, deli si gasisi ivigakaisi makawala kasi kakapula.

⁷Mitugaga bidubadu isunapulasi metoya oninasi, e gala wala bisimwaisi nanamsela vavagi gaga.

⁸Igigilaisi tuwoli tomota, e ililivalasi paila vavagi gaga. Matausina ninasi walakaiwa e ininamsaisi ammakawala bilamidadaisi sesia.

⁹Ibigigagaisi Yaubada wa labuma, e deli si kaluvalova ikikaraiwogaisi mina watanawa.

¹⁰E ka! - Yaubada la tomota itovilakaisi matausina, e deli si mwasawa idubumaisi komwaidona avaka ilivalaisi.

¹¹Kawasi, “Yaubada gala wala binikoli avaka. Matauna Towalakaiwa Sainela[154] gala bibani avaka.”

¹²Baisa makawala goli si bubunela tomitugaga. Si guguwa bidubadu wala, e tuta tuta ikatumkulovaisi guguwa tuvaila.

¹³E yeigu layamataigu kidamwa nanogu migileu wala. Tobwaila wala yeigu e gala avai mitugaga lavagi. Ki, kaina gala dimlela ulo pwaitukula ke?

¹⁴Mwa Yaubada! Lokuyomiyuyaigu[155] yam komwaidona. Kaukwau kwaitala kwaitala yoku lokumipukwaigu.

¹⁵Kidamwa avai tuta lalilivala makawala baisa, baisa avaka lauvagi gala bibudoki yoku m tomota.

¹⁶Avigikoni mwada baninamsi uulotoula vavagi makwaina mitaga gala wala ibodaigu, paila saina mwaugaga nanamsela.

¹⁷Mitaga oluvi alokaia asuvi om Bwala Kwebumaboma, e tuta matutona lanakaigali avaka biviloubusi baisa tomitugaga.

¹⁸Yoku bukusaili matausina okabasi saina dumokikina, e bukuvigaki bikapusisi bisilagisi wala,

¹⁹e otukolela wala biwokuva si momova. Si tuta kala vigimkovila bisalilisi bibodasi saina kabokakayuwa.

²⁰E matausina makawala mimi wala eiyam bogwa bitamwau. E Guyau, avai tuta yoku kutokaia e matausina bitamwausi.

²¹Avai tuta aninamsi vavagi makwaisina saina yayana, e agu lumkola gala wala bwaina,

²²tuta matutona yeigu makawala natana mauna nanagowa. Gala wala bitapuloki nanogu paila yoku.

²³Mitaga tuta komwaidona asisu otalim, e yoku kuiyosi yamagu.

²⁴Kuvakadaigu metoya om vituloki, e okala vigimkovila ulo momova, bukubodaigu deli agu taimamila.

²⁵Ki, avai vavagi tuvaila isisu wa labuma paila yeigu, mesinaku wala yoku? E gala wala avaka bikau nanogu baisa ovalu watanawa, mesinaku wala kammwaleta yoku.

²⁶Kaina nanogu deli wowogu bimama, mitaga Yaubada matauna wala ulo peula. Kalamwaleta wala matauna bibodaigu.

²⁷Matausina availa availa bisilavaimsi mokwita goli bidoumlabasi. E matausina availa availa bipakaimsi, yoku goli bukukwatumtuwoli.

²⁸Mitaga yeigu, bogwa lalumkoli avai tuta Yaubada deli yeigu, baisa saina bwainigaga! Paila Guyau Yaubada tuta tuta ikolaigu, e yeigu gagabila bakamituli komwaidona avaka avaka eiuvagi.