Read Kilivila SAM 74 Bible Online

SAM 74 - Kilivila bible

SAM 74

¹Mwa Yaubada! Avaka uula bogwa lokusilavaimasi makawala baisa? Ki, bogwa wala bukugibuluwi m tomota tatoum tuta gala biwokuva?

²Kululuwai m tomota, matausina bogwa lokunigibogwi paila titoulem, matausina bogwa lokumai metoya okatupipi[156] e kuvigaki m tomota tatoum. Kululuwai makwaina Koya Saiyoni,[157] ambaisa lokusibogwa.

³Kuliloula ambaisa eikatudidaimisi valu. Kama tilaulasi bogwa eikatudidaimisi vavagi kwaitala kwaitala wa Bwala Kwebumaboma.

⁴Kam tilaula bogwa leigovasi paila kalisewa om Bwala Kwebumaboma. Bogwa leivitauwaisi si midimidi baisa, makawala kabutuvatusi paila itomgwagasi.

⁵Matausina kasi gigisa makawala totavi kai, ililikubilasi kai deli si legisa.

⁶Ikatugunugunaisi komwaidona kai makaisina bwala kala katububula deli si legisa toyo kabotutu kaivakaveka.

⁷Matausina ikodidaimisi m Bwala Kwebumaboma deli igabwaisi wa kova. Matausina iyogwalaisi bolela m tapwaroru.

⁸Matausina magisi bikatumkumkwaimasi mokwita. Igibuwolisi komwaidona kabotapwaroru olopola valu.

⁹Komwaidona da kabutuvatusisi kwebumaboma bogwa leitamwausi, e gala taitala tovitoubobuta ikesa, deli gala taitala inikoli avai tuta mwau makwaina biwokuva.

¹⁰E Yaubada, ammakawala kala woloula kama tilaulasi bigigilaimsi? Ki, matausina bikatudeuwaimsi tuta gala biwokuva?

¹¹Avaka paila yoku lokupakaimasi? Avaka paila lokukwatupwi yamam?

¹²E Yaubada, yoku wala ma Guyausi metoya okala vitouula. Yoku bogwa lokukolaimasi tuta bidubadu.

¹³Metoya om peuligaga bolita kuwotuli, deli kukwatugigai pwanetasi bolita maunela navakaveka.

¹⁴Bogwa lokukwatugunugunu makwaisina pwanetala minana naveka Dokanikani,[158] deli wowola kuvakoma oviloupakala maunela nasigisagina.

¹⁵Bogwa lokuvagi waya deli sakala ititayelusi. Kaduyovakaveka waya kukwatumadi.

¹⁶Bogwa kububuli yam deli bogi. Kusaibwailaki kalasia deli tubukona osi kabototu.

¹⁷Kusaibwailaki kala kalitutila valu watanawa. Lokuvagi kweluvala yuviyavi deli kweluvala tula.

¹⁸Mwa Guyau! Kululuwai kam tilaula igigilaimsi wala. Matausina gala si yaubada, deli ikaluwouwaimsi.

¹⁹Taga kuligaiwa m tomota tomamama baisa kasi tilaula togigasisi. Taga kulumwelavi m tomota availa availa eibodaisi lamadada.

²⁰Kululuwai kabutu makwaina[159] lokuvagi deli yakamaisi. Kabilia isisu odudubila ambaisa ambaisa olopola valu kwaitala kwaitala.

²¹Taga kutagwala matausina eibodasi lamadada bimmosilasi. Mitaga ibodi matausina tonamakava deli matausina togumalawa biyakawolaimsi.

²²Mwa Yaubada! Kuvigimamalu kutokaia, kupilasaimasi yakamaisi m vavagi. Kululuwai matausina gala si yaubada igigilaimsi yam kwaitala kwaitala.

²³Taga kulumwelavi si ukuwakula kam tilaula, deli mowai isaitaula wala metoya oyowai.