Read Kilivila SAM 77 Bible Online

SAM 77 - Kilivila bible

SAM 77

¹Adou kaigagu kaigaveka baisa Yaubada. Adou kaigagu kaigaveka, e matauna ilagaigu.

²Wa tuta mwau anigada baisa Guyau. Wa bogi kwemwaidona ayosali yamagu deli ulo nigada, mitaga gala wala gagabila babani visimoli.

³Avai tuta baninamsi Yaubada, batiliawai wala. Avai tuta biiluyelu nanogu, agu lumkola deli wala ninayuwa.

⁴Matauna iyommataigu wa bogi kwemwaidona. Gala gagabila babigatona paila saina ulo nokubukubu.

⁵Aninanamsa paila tuta leimwaim, deli aluluwai taitu makwaisina omitibogwʹo.

⁶Bogi kwemwaidona aninanamsa saina peula. Iiluyelu nanogu, e baisa makawala akatupoiyaigu titoulegu, kawagu,

⁷“Ki, Guyau bogwa wala bipakaitulaidasi? Ki, gala wala gagabila tuvaila bimwamwasila nanola paila yakidasi?

⁸Ki, bogwa leiwokuva la yebwaili paila yakidasi kaina? Ki, la biga katotila gala bikamokwita?

⁹Bogwa eilumwelavi paila binokapisi kaina? Ki, bogwa wala bigibuluwa bikaimapu la nokapisi kaina?”

¹⁰E oluvi alivala kawagu, “Wa! Yaubada la peuligaga bogwa leiwokuva. E baisa goli ivigaki agu mmayuyu sainela!”

¹¹Mwa Yaubada! Tuta komwaidona baluluwai wala avai vavagi topilaveka lokuuvagi. E baluluwai tuvaila makwaisina kabokatubau lokuuvagi bogwa leimwaim.

¹²Baninanamsa paila komwaidona avaka makwaisina lokuuvagi, e tuta komwaidona biiluyelu nanogu paila m vavagi topilaveka.

¹³Mwa Yaubada! Komwaidona vavagi lokuuvagi baisa kwebumaboma[163] wala. Gala taitala yaubada kala tovakaigaga makawala yoku.

¹⁴Yoku wala Yaubada kammwaleta kuuvagi kabutuvatusi. Kuyomitali m peuligaga oluwalaisi boda ituwoli ituwoli.

¹⁵Metoya om peula kukwatumovi m tomota, matausina dalesi Yekobe deli Yosepa.

¹⁶Mwa Yaubada! Avai tuta bolita igisaim ikokola wala, e deli tukutakula bolita imotatina.

¹⁷E lowalowa ilupisau kuna, e pilapala iwawai wa labuma, deli kavikavila ikavili ambaisa ambaisa.

¹⁸Butula m pilapala idududu, e kavikavila visigala ivisigili watanawa. Valu watanawa iyega deli imotatina.

¹⁹Yoku kuloula oluwalaisi kaisai. Kuluvipeili tilibwabwau, mitaga bakwaim gala igagabila bitagisi.

²⁰Kukugwai m tomota makawala toyamata bikugwai la sipi, e kusaiki Mosese sola Eroni kidamwa bikugwaiyaisi matausina.