Read Kilivila SAM 78 Bible Online

SAM 78 - Kilivila bible

SAM 78

¹Ulo tomota, kulagaisi ulo vituloki, e kunakaigalaisi bibwaina avaka balivali.

²E yeigu ibodi babigitomoya deli bakatumiki vavagi kwekatupwana omitibogwa,

³vavagi makwaisina bogwa talagaisi deli tanikolaisi, vavagi makwaisina tumidaiasi bogwa eilukwaidasi.

⁴Gala ibodi bitakatupwanaisi metoya olitudoiasi. Bitalivalaisi makwaisina baisa tubwa matubona igau bima, bitalivalasi avaka Guyau la peula deli vavagi topilaveka deli kabokatubau avaka bogwa leivagi.

⁵Matauna isisaiki karaiwaga makwaisina baisa mina Isireli, deli la karaiwaga isim kala ginigini baisa dalela Yekobe. E ikatululuti tubudoiasi paila bivitulokaisi makwaisina la karaiwaga baisa litusia,

⁶mapaila baisa tubwa matubona igau bima ibodi bitakutaisi makwaisina, mwada igau tuta bima ibodi bilukwaisi baisa litusia.[164]

⁷E wa keda makadana wala matausina deli goli bidubumaisi baisa Yaubada, e gala bilumwelavaisi avaka bogwa leivagi, mitaga tuta komwaidona bikabikuwolaisi makwaisina la katuloluta.

⁸E matausina gala bivagaisi makawala tubusia, saina tokosomapu deli tokowolova goli. Matausina tobubogwa si dubumi baisa Yaubada iigayega wala, e gala wala itotusi peula deli si kimadagi baisa Yaubada.

⁹Mina Epereim ikapupaiyaisi si kaiyala mitaga isakaulasi wala oyamla kabilia.

¹⁰E gala sitana ivagaisi makawala si kabutu[165] deli Yaubada, e ipakaisi bikabikuwolaisi la Karaiwaga.

¹¹Ilumwelavaisi avaka matauna bogwa leivagi, e kabutuvatusi makwaisina avaka bogwa eigisaki mitasi.

¹²Wa tuta makwaina tubusia eigigisaisi, Yaubada eiuvagi kabutuvatusi makwaisina[166] mapilana oitayatilela Sowana isisu mapilana valu Itipita.

¹³Ivigaki bolita bitabai e iluvipeili matausina oluwalela goli, e ivigaki sopi itolisi makawala tabodala bwala.

¹⁴Wa yam ikugwai matausina metoya olowalowa, e wa bogi kwemwaidona metoya ovisigala kova.

¹⁵Ikatuvi dukutotu oviloupakala e isaiki matausina kasi sopi metoya osikowala pwaipwaia.

¹⁶Ivigaki sopi sumokainia iviloubusi metoya odukutotu, e ititayelu makawala waya.

¹⁷Mitaga isikileiwaisi wala mitugaga baisa Yaubada, deli oviloupakala ikominimanisi baisa matauna saina Towalakaiwa.[167]

¹⁸Matausina ininatalasi biwakolaisi Yaubada, e ilukwaisi avai kaula magisi bikomasi.

¹⁹Ikavilakaisi Yaubada kawasi, “Ki, ibodi Yaubada bisakaidasi kaula oviloupakala?

²⁰Baisa biga mokwita matauna iwaiya dukutotu, e sopi igiposisi. Mitaga ki, ibodi bisakaidasi beredi deli gwaba baisa yakidasi la tomota?”

²¹Mapaila baisa Guyau igibuluwa avai tuta ilagi si biga, e iwaiya la tomota metoya wa kova. E la gibuluwa baisa matausina isisiniveka,

²²paila uula gala idubumaisi matauna, deli gala idubumaisi paila bikatumovi matausina.

²³Mitaga iluki labuma walakaiwa, e ikaraiwogi kala lulu bikapogegasi.

²⁴E isaiki matausina kaula metoya wa labuma, e iwitali ididebwalisi mana paila matausina bikamsi.

²⁵Mapaila baisa mwada anelosi kʹasi eikomasiga, deli Yaubada eisaiki komwaidona avaka magisi.

²⁶E tuvaila ivigaki yagila bomatu iuu, deli metoya ola peula ikatumwali yagila bolimila.

²⁷E iwitali mauna baisa la tomota, e kala bidubadu makawala kanakenuva okawolawa.

²⁸Ikapusisi olopola kabosikaiwa deli ikanuulaisi buliyoyova ikanupataisi.

²⁹Mapaila baisa tomota ikamsi e ikomatasi. Yaubada isaiki matausina avaka magisi.

³⁰Mitaga gala wala iukuwokuva kasi vikeiya, mapaila iyayosasi wala kamkwam,

³¹avai tuta Yaubada eigibuluwa baisa matausina e ikatumati matausina dabala si wota, e matausina si todabala tubovaula Isireli.

³²Mitaga tomota isikileiwaisi wala mitugaga, kalubikoya eivagi la kabutuvatusi mitaga gala wala idubumaisi matauna.

³³Mapaila baisa ivigimkulovi si tuta makawala sivatala wala yagisa, deli ikatumtuwoli matausina metoya osilagi.

³⁴E avai tuta wala bikatumati mimilisi, e kesalaga komwaidosi bitovilakaisi matauna, bininavilasi e bikayubabaisi baisa matauna.

³⁵Bogwa eiluwaisi mwada Yaubada matauna kasi tokwala, e matauna Topeuligaga kasi topilasi.

³⁶Kasi udokaiwa wala ililivalasi, mitaga si biga komwaidona sopawokuva wala.

³⁷Komwaidosi wala gala ikatilavaisi titoulesi baisa matauna, e gala ivagaisi makawala si kabutu deli matauna.

³⁸Mitaga Yaubada saina inokapisi la tomota, iligaiwa si mitugaga deli gala ikatumtuwoli matausina. Sivabidubadu la gibuluwa ikiyumali, deli iyosi kala leiya.

³⁹Iluluwai paila matausina mina watanawa wala, kaina matausina makawala yagila biuu wala bima, biuyeiya.

⁴⁰Sivabidubadu ikosomapwaisi Guyau oviloupakala, e sivabidubadu eiyomwauwaisi nanola!

⁴¹Tuta tuta iwakolaisi wala Yaubada, e isisakaisi kala mmayuyu matauna mina Isireli si Yaubada Tobumaboma.

⁴²Matausina bogwa eilumwelavaisi la peuligaga, e ilumwelavaisi yam makwaina eikoli matausina metoya oyumasi kasi tilaula,

⁴³e deli ivagi vavagi topilaveka deli la kabutuvatusi mapilana oitayatilela Sowana isisu mapilana valu Itipita.

⁴⁴Ikivili waya imili buyavi, e mina Itipita gala wala sitana sopi paila bimomsi.

⁴⁵E iwitali nigunagu baisa matausina saina ikaiki uwosi, e deli kumeu minasina iyogagaisi si valu.

⁴⁶E iwitali nipawa paila bikomasi si bagula, e deli biyogagaisi kwabila.

⁴⁷Ikatumati matamsina si waini metoya kuna kwekulokula, e deli si seuseu metoya wa numla.

⁴⁸Ikatumati si bulumakau metoya kuna kwekulokula, e deli si sipi mayuwosina metoya kavikavila.

⁴⁹Ivigaki baisa matausina saina ninamwau kwaiveka, e ikasau la gibuluwa deli la gidaleiya, ivigaki la katumatila paila kaliga.

⁵⁰Gala goli ikiyumali kala leiya kaina ikoli si momova, mitaga ikatumtuwoli wala metoya wa lelia mwau.

⁵¹Ikatumati si kuluta tauwau komwaidona mina Itipita.

⁵²E oluvi ivakouli la tomota ivisunupuloi makawala taitala toyamata iiyamati la sipi, e ivakadi matausina metoya oviloupakala.

⁵³Ivakouli matausina ilau mitilabi wala, e gala wala ikokolasi, mitaga bolita itayelu ikeiita e ikuboli kasi tilaula.

⁵⁴Iviloubusii matausina baisa ola valu kwebumaboma, baisa koya makwaisina Guyau titoulela eiyouli.

⁵⁵Ibokavili tomotala valu makwaina avai tuta la tomota eisuvaisi kulusi. Ivili si pwaipwaia oluwalaisi dalela Isireli, deli isaiki si bwala baisa la tomota.

⁵⁶Mitaga matausina ikosomapwaisi wala Yaubada Topeuligaga, e iwakolaisi matauna. Matausina gala ikabikuwolaisi la karaiwaga isim kala ginigini,

⁵⁷mitaga saina tokosomapu deli tokowolova makawala tumisia, e gala isim kasi yeiwau, makawala kaiyala kaididoudoga.

⁵⁸Iyogibuluwaisi matauna metoya si kabotapwaroru baisa yaubada sasopa, e metoya si tokolu iyuvaisi kala leiya.

⁵⁹Yaubada igibuluwa avai tuta eigisi makawala, mapaila baisa ipakaivigasi wala la tomota.

⁶⁰Isilavi la buliyoyova[168] mapilana Sailo,[169] bwala makwaina ambaisa eisibogwa deli yakidasi.

⁶¹E itagwala kada tilaulasi bilebwaisi Kabutu Didawogala,[170] makwainaga kabutuvitusila la peula deli la guyugwayu.

⁶²Matauna igibuluwa baisa wala la tomota tatoula, e itugwali matausina bikaligasi oyumasi kasi tilaula.

⁶³Uluulatila ikaligasi okabilia, e kapugopugula gala wala availa bivaiyasi.

⁶⁴Tolula ikaligasi metoya oyowai, e kakausi gala itagwalasi paila bilibusi.

⁶⁵E kala vigimkovila Yaubada imamata e kala gigisa makawala eitokaia metoya omasisi, e matauna makawala taitala tau saina topeula avai tuta eimom waini.

⁶⁶Ibokavili kala tilaula ikeiitasi deli kasi mmosila gala biwokuva paila eikalisau.

⁶⁷Mitaga ipaiki dalela Yosepa, e gala inagi dalela Epereim.[171]

⁶⁸Kaimapula wala inagi dalela Yuda,[172] deli makwaina Koya Saiyoni, makwaina goli kwembwailila.

⁶⁹E mapilana valu ikaliai la Bwala Kwebumaboma, makawala goli la valu wa labuma. E ivigaki gala biyega, makawala valu watanawa kala peula, bitovagasi tuta komwaidona.

⁷⁰E inagi la touwata Debida. Ikau matauna metoya osaivau,

⁷¹baisa goli matauna iiyamati mayuwosina la sipi, e ivigaki matauna biguyoi mina Isireli, e matauna goli Yaubada la tomota kasi toyamata.

⁷²Debida ivauli matausina metoya ola ninatotila, e ivakadi matausina metoya ola giyoubwaila.