Read Kilivila SAM 80 Bible Online

SAM 80 - Kilivila bible

SAM 80

¹Mwa! Yoku kasi Toyamata mina Isireli, kulagaimasi. M yawa kala tokugwa yoku, kulagi ma bigasi. Yoku kusili om takaikaia odubasi minasina bubuli isim pinupanesi.[174]

²Kuyomitalaim baisa madilasina dalesi Epereim, Beniamina deli Manasa.[175] Kuvitulokaimasi m peula, e kuma bukukwatumovaimasi.

³Mwa Yaubada! Kukwaimilivauwaimasi. Kunokapisaimasi, e bakabanaisi kama katumovasi.

⁴Mwa! Guyau Yaubada Topeuligaga, ammakawala kala woloula bukugibuluwi[176] ma nigadasi yakamaisi m tomota?

⁵Yoku lokusakaimasi ninamwau okuvigaki kamasi bakakamsi, e kwelaveka bolula mitalogi okuvigaki kama sopisi bakamomsi.

⁶Lokutugwali mabudosina boda ituwoli ituwoli otalila bikabiliasi mwada biyoulisi ma valusi, e kama tilaulasi ibigigagaimasi.

⁷Mwa! Yaubada Topeuligaga, kukwaimilivauwaimasi. Kunokapisaimasi, e bakabanaisi kama katumovasi.

⁸Lokukwalitati tamtala waini[177] metoya mapilana Itipita, e kubokavili boda ituwoli ituwoli, e lokuvali matamna osi valu.

⁹E kutamigileu matamna, e kaiviliwalila eisonusi sainela e tammla itetila wala ikaligiaki valu.

¹⁰Kuyowala ikuboli koya komwaidona, e sisila goli ikalisuwolaisi kweisila kaivakaveka.

¹¹Sisila matamna ilovasi ilosi opilikwaibwaga, mapilana Bolita Kwaiveka, e opilibomatu maduyona Waya Yupereiti.

¹²Avaka uula lokukwatudidaimi kalila matamna? Ka, availa ililoula opapala gagabila bikoumakavi kaiuwala.

¹³Bolodila[178] ivapupoiyaisi, e avai mauna avai mauna isusuvisi ikamkomasi kaiuwala.

¹⁴Mwa! Yaubada Topeuligaga, kutovilakaimasi! Kukululukwaimasi metoya wa labuma. E kuma kukolaimasi yakamaisi m tomota.

¹⁵Kuma bukukoli matamna lokuvali, matamna goli lokuvigaki bitamveka.

¹⁶Kama tilaulasi ikapitunaisi matamna e igabwaisi. Kukululuki deli m ninamwau, e kumtuli matausina.

¹⁷Bukukolaimasi deli bukutabodaimasi yakamaisi lokunagaimasi mwada m tomota, paila omitibogwa kukwatupewolaimasi sainela.

¹⁸Gala tuvaila bakatotubulokaimsi. Kuyomovaimasi, e bakayakawolaimsi goli.

¹⁹Mwa! Guyau Yaubada Topeuligaga, kukwaimilivauwaimasi. Kunokapisaimasi, e bakabanaisi kama katumovasi.