Read Kilivila SAM 81 Bible Online

SAM 81 - Kilivila bible

SAM 81

¹Kugovasi deli mwasawa baisa Yaubada matauna kada tokwalasi. Kuwosisi yakaula baisa Yekobe la Yaubada.

²Kulatataisi kaisosau deli kukimgolaisi sasani. Kumwasawaisi butula bwaina metoya wa gita deli yuka.

³Kuyuvaisi tauya paila vilouwosi,[179] avai tuta tubukona navau deli avai tuta tubukona biyapila.

⁴Baisa goli kasi karaiwaga mina Isireli, e karaiwaga metoya baisa Yekobe la Yaubada.

⁵E bogwa eisaikibogwi baisa mina Isireli, avai tuta eiyowai mapilana valu Itipita. Lalilagi kaigila kaigimitawasi eililivala, kawala,

⁶“Bogwa lakau koni mwau[180] metoya ovilavami, e atugwalaimi bukutayaisi mi koni makwaisina dakuna.

⁷Avai tuta lokubodasi mwau bogwa kudousi baisa yeigu, e bogwa lakolaimi. Metoya ogu kwabosupepuni outuyagila, yeigu lamapu mi dou. Yeigu awakolaimi mapilana outuwotula Meriba.

⁸Yokomi ulo tomota, kunakaigalaisi avaka ulo katuloluta. O mina Isireli, saina magigu yokomi bukunakaigalaigusi!

⁹Yokomi gala wala avai tuta ibodi bukutapwarorusi baisa natana ituwoli yaubada.

¹⁰Yeigu wala Guyau mi Yaubada, lavisunupuloiyaimi metoya mapilana Itipita. Kukwapogegasi e yeigu bavakomaimi.

¹¹“Mitaga ulo tomota gala wala inakaigalaigusi. Mina Isireli gala wala ikabikuwolaigusi.

¹²Mapaila baisa yeigu akilavi wala matausina saina kasai dubasi, e atagwala bivagaisi avaka ninasi.

¹³Saina magigu ulo tomota kidamwa binakaigalaigusi. Saina magigu matausina kidamwa bikabikuwolaigusi!

¹⁴Kaguyam makawala, saina nanakwa wala bakalisau kasi tilaula, e batomgwaga odubasi kasi leiya komwaidona.

¹⁵Matausina eivigakaigusi tokukolosi igau bikululusi omatagu deli kasi kokola, e kasi mipuki bogwa bikanigaga goli.

¹⁶Mitaga yeigu bavakomaimi metoya odilimoya witi, deli bavakomataimi metoya kitorina kwebubolodila.”