Read Kilivila SAM 85 Bible Online

SAM 85 - Kilivila bible

SAM 85

¹Mwa Guyau! Yoku bogwa kunokapisi m valu, e yoku kuvigaki mina Isireli biyubwailasi tuvaila.

²Yoku bogwa kuligaiwa m tomota si mitugaga, deli kulumwelavi komwaidona si sula.

³Yoku kusim gibuluwa[186] baisa matausina, e kukwatuyumali m gidaleiya sainela.

⁴Mwa Yaubada! Kama tokwatumovasi yoku kukwaimalaimasi, e desi taga kuninamwau baisa yakamaisi.

⁵Ki, bogwa wala bukugibuluwaimasi tuta komwaidona? Ki, mwada m gibuluwa gala avai tuta biwokuva?

⁶Kukwatupewolaimasi tuvaila, e yakamaisi wala m tomota bakayakawolaimsi.

⁷Mwa Guyau! Kumitukwaiyaimasi, e kupilasaimasi paila bukukwatumovaimasi.

⁸Yeigu laninakaigila wala avaka Guyau Yaubada eililivala. Ikatotila vakota baisa yakidasi la tomota tatoula, kidamwa gala tuvaila bitakeiitasi oda kidikedasi nagowa.[187]

⁹Biga mokwita matauna eitulotula wala bikoli matausina availa availa itemmalaisi matauna, e makawala wala matauna Tokwatumova bisisu oda valusi.

¹⁰E yebwaili deli kimadagi bogwa bibodasi wala, e mitukwaibwaila deli vakota bogwa bikaipapasi goli.

¹¹Tomota si katalova bimwena ovalu watanawa, e Yaubada la mitukwaibwaila bikululuki metoya wa labuma.

¹²Guyau bivigakaidasi bitayubwailasi, e da pwaipwaiasi kaiuwala bivigaki bitaluvabwailasi.

¹³Mitukwaibwaila bikugwa omatala Guyau, e bikatubiasi la keda matauna.