Read Kilivila SAM 88 Bible Online

SAM 88 - Kilivila bible

SAM 88

¹Mwa Guyau! Yoku agu tokwatumova, yam kwemwaidona adoudou wala, e wa bogi ama baisa omatam.

²Kulagi ulo nigada, e kunakaigali ulo dou paila pilasi!

³Yeigu saina abudoboda vavagi mwau bidubadu, e katitaikina wala bakaliga.

⁴Yeigu makawala komwaidosi availa availa makateki bikaligasi. Ulo peula komwaidona bogwa leiwokuva.

⁵Yeigu bogwa lokusilavaigu oluwalaisi tokwaliga. Yeigu makawala matausina bogwa eikatumataisi e ikanukwenusi okasi laka, matausina yoku bogwa kulumwelavi wala, e gala wala gagabila bukupilasi.

⁶Yoku bogwa kulavaigu alʹo osikowala laka, e asisu olumoulela mesi[189] saina kwedudubila deli kwaiwonaku.

⁷E m gibuluwa[190] bogwa eitumkwaigu, e makawala kaisai ikatupilipilaigu.

⁸Yoku bogwa kuvigaki lubaigwa eisilavaigusi. Kuvigaki matausina ikasilalaigusi.[191] Ikatubudokaigusi bwala e gala gagabila basakaula.

⁹Matagu bogwa eimama metoya agu mmayuyu. Mwa Guyau! Yam kwaitala kwaitala adoudou baisa yoku, e ayosali yamagu aninigada baisa yoku.

¹⁰Ki, ibodi bukuvagi kabutuvatusi paila tokwaliga? Ki, matausina bitokaiasi e biyakawolaimsi kaina?

¹¹Ki, sitana ibigitonisi m mitakwai olumoulela laka? Kaina ilivalaisi m kimadagi oviluwela kaliga?

¹²Ki, kaina bogwa eigisaisi m kwabutuvatusi mapilana viluwela dubilikitakita, kaina eigisaisi m bobwailila mapilana si valu matausina totamwau?[192]

¹³Mwa Guyau! Adou baisa yoku paila pilasi. Kaukwau kwaitala kwaitala aninigada baisa yoku.

¹⁴Mwa Guyau! Avaka paila kupakaigu? Avaka paila kutotubulokaigu?

¹⁵Igau otubovaugu e leima lagaila akougoli wala agu mmayuyu, deli avakatitaikina wala kaliga. Mokaila m mipuki bogwa eiyomami wowogu.

¹⁶M gidaleiya saina peula igimsisaigu, e m lewa saina nommayuyu ikikatumataigusi.

¹⁷Yam kwemwaidona m lewa itavinaigusi itapataigusi makawala sakala. E manosina lewa ikatuulaigusi ikatupataigusi goli.

¹⁸Yoku bogwa kuvigaki lubaigwa tatougu goli eisilavaigusi, e dudubila wala lavigaki kalogu.