Read Kilivila SAM 89 Bible Online

SAM 89 - Kilivila bible

SAM 89

¹Mwa Guyau! Tuta komwaidona bausiwosi paila m mitakwai, e bakamituli paila m kimadagi, tuta gala wala biwokuva.

²Anikoli m yebwaili bikanigaga e gala wala biwokuva, deli m kimadagi bikanigaga makawala labuma.

³Yoku kawam, “Bogwa lakabutu deli matauna availa lanagi, e bogwa lakatotila baisa ulo towotetila Debida,

⁴e kawagu, ‘Tuta komwaidona taitala tubumwa biguyau baisa,[193] e dalem gala wala biwokuva, mitaga bititasusilasi wala.’”

⁵Mina labuma[194] iusiwosisi vavagi makwaisina kabokatubau avaka lokuvagi e iyakawolaisi saina Tokimadagi yoku.

⁶Mwa Guyau! Gala availa isisu wa labuma makawala yoku, e gala taitala guma labuma gagabila bipataim.

⁷Tobumaboma[195] osi gugula ikamiabaimsi, e komwaidosi matausina itutuvakau ninasi paila yoku.

⁸Mwa! Guyau Yaubada Topeuligaga, gala avai topeuligaga makawala yoku. E Guyau yoku wala tokimadagi paila komwaidona avaka avaka kuuvagi.

⁹Kukwaraiwogi bolita saina kwaipeula. Kuyominum kaisai saina eipupaisaga.

¹⁰Kuwaiya minana dokanikani Reyabi[196] e lokukwatumati, e metoya om peula saina peuluvagasi lokukwalisau matausina kam tilaula.

¹¹Labuma baisa m vavagi e makawala goli valu watanawa. Lokububuli valu watanawa deli goli uvagila komwaidona.

¹²Lokububuli mapilasina opiliyavata e opilibolimila. Makwaisina Koya Teibo deli Koya Emoni[197] iusiwosisi deli mwasawa baisa yoku.

¹³Yoku m peula gala wala bitakaibiga, saina topeuligaga yoku.

¹⁴Tumilela m kwabokwaraiwaga mitukwaibwaila deli karaiwaga duwosisia, e komwaidona avaka avaka kuuvagi iyomitali m yebwaili deli m kimadagi.

¹⁵Saina imwamwasila ninasi matausina itapwarorusi deli wosisi baisa yoku. Matausina goli isisuaisi olumalamela m ninabwaila.

¹⁶Yam komwaidona imwasawasi paila uula yoku, e ikavisaimsi paila m bobwailila.

¹⁷Yoku kuvigakaimasi katomgwagasi, e katomgwagasi goli metoya om yebwaili.

¹⁸E Guyau, yoku lokunagi kama tokwalasi, e yoku, mina Isireli si Yaubada Tobumaboma goli, lokusakaimasi matauna ma guyausi.

¹⁹Omitibogwa kuluki matausina m towotetila tokimadagi metoya okilisala, kawam, “Bogwa lapilasi taitala kumatoula. Bogwa lanagi taitala metoya baisa tomota, e lasaiki matauna la guyau.

²⁰Avaputumi matauna Debida ulo towotetila metoya bulami kaibumaboma, e lavigaki matauna biguyau.

²¹Tuta tuta ulo peula bisikaili matauna, e yeigu bakatupewoli matauna.

²²Gala avai tuta kala tilaula bipeulasi odabala matauna. e tomitugaga gala wala bikalisauwaisi matauna.

²³Bogwa bamtuli kala tilaula, e bakatumati komwaidosi availa availa ivigakaisi tokukolosi matauna.

²⁴Bogwa bayebwaili, deli bagiyoubwaila baisa matauna, e tuta tuta bavigaki bitomgwaga wala.

²⁵La kabokwaraiwaga bakatumkulovi metoya Bolita Kwaiveka bilʹo wa Waya Yupereiti.

²⁶Bogwa bilukwaigu kawala, ‘Yoku goli tamagu deli ulo Yaubada yoku. Agu tokwala yoku, e agu tokwatumova.’

²⁷Bavigaki matauna ulo kuluta tau,[198] e matauna giyoumatala odubasi gweguya komwaidosi.

²⁸Tuta tuta bavagi makawala ulo biga katotila baisa matauna. e ulo kabutu deli matauna gala wala biwokuva, bikanigaga goli.

²⁹Dalela bikanigaga makawala labuma kwekanigaga, e tuta komwaidona taitala tabula biguyau.

³⁰“Mitaga ka - kidamwa tubula bikoulovaisi ulo karaiwaga, e gala bibubunasi makawala avaka lakaraiwogi,

³¹kidamwa gala bilagaisi ulo katuloluta, kaina bikabikuwolaisi makwaisina ulo karaiwaga,

³²e bogwa bamipuki matausina paila si mitugaga, e bavigaki bilumkolaisi kala mmayuyu si sula.

³³Mitaga gala wala basim kala mitakwai Debida, kainaga balumwelavi ulo biga katotila baisa matauna.

³⁴Gala bakotuni ulo kabutu deli matauna, kainaga bakodidaimi kwaitala wala ulo biga katotila baisa matauna.

³⁵“Ka, baisa goli yeigu Tobumaboma ulo biga katotila, e baisa ulo biga bikanigaga goli. Gala avai tuta basasopa baisa Debida.

³⁶Tuta komwaidona dalela bititasusilasi, e yeigu baiyamati wala la kabokwaraiwaga, makawala kala woloula kalasia bikakata wala.

³⁷Kabokwaraiwaga makwaina bikanigaga makawala tubukona bikanigaga, kaina makawala labuma kwekanuvagasi.”

³⁸Yoku kugibuluwi guyau matauna lokunagi. Lokusilavi e lokupaiki matauna.

³⁹Bogwa lokukotuni m kwabutu deli m touwata, e kala kulupaipi kulavi ila opwadidiweta.

⁴⁰Lokukodidaimi kalila la valu,[199] e bolela kabilia kukwatudidaimi, eiwokuva wala.

⁴¹Komwaidosi availa availa ililoulasi makadana iuveilausi la guguwa, e sala komwaidosi igigilaisi matauna.

⁴²Lokutugwali kala tilaula bitomgwagasi, e kusaiki komwaidosi matausina si mwasawa.

⁴³Kuvigaki la guguwa guguwala kabilia gala wala dimlesi, e lokutagwala bikalisauwaisi matauna okabilia.

⁴⁴Lokukwaimali la kaitukwa oyamala, makaina kabutuvitusila la guyau, e la takaikaia kulavi wala ila opwaipwaia.

⁴⁵Matauna saina nanakwa kala tomoya gala ibudoki la tuta, e kuyomsili wala matauna.

⁴⁶Mwa Guyau! Ki, tuta komwaidona bukukwatupwanaim wala? Ammakawala kala woloula m gibuluwa bilululu makawala kova?

⁴⁷Bukululuwai ulo momova kukupi wala! E kululuwai komwaidomasi mina watanawa bakabodasi kaliga.

⁴⁸Availaga gagabila bisivagasi e gala wala bikaliga? Ammakawala tomota bipakaisi kaliga?

⁴⁹Mwa Guyau! Ambaisa mitakwai makwaisina eivitububoti m yebwaili? Ammakawala makwaisina biga katotila lokusaiki Debida?

⁵⁰Taga kulumwelavi ammakawala eibigigagaigusi yeigu m touwata, e ammakawala lapeuloki tutala matausina gala inikolaimsi ibulotaigusi.

⁵¹Mwa Guyau! Kam tilaula ikaluwouwaisi m guyau matauwena lokunagi, e ambaisa ambaisa matauna bilokaia, ikikaluwouwaisi wala matauna.[200]

⁵²Kala yakaula Guyau, tuta gala biwokuva. Emeni! Emeni!