Read Kilivila SAM 9 Bible Online

SAM 9 - Kilivila bible

SAM 9

¹[22] Mwa Guyau! Bayakawolaim metoya onanogu komwaidona. E balilivali komwaidona makwaisina vavagi saina bwainigaga avaka bogwa lokuvagi.

²Bawosi deli mwasawa uula goli yoku. E bawosi kam yakaula yoku Yaubada Topeuligaga.

³Agu tilaula bikeiitasi avai tuta bukuviloubusi. Matausina bikapusisi wala e bikaligasi.

⁴Yoku tokibobuta deli tokamokwita om yakala, e bogwa kukwabwailigu oyakala.

⁵Yoku bogwa kukwamogi matausina gala inikolaimsi, e kukwatumtuwoli tomitugaga. Gala tuvaila kasi luluwai bisisu.

⁶Kama tilaulasi bogwa wala leidoumlabasi. Yoku bogwa kukwatudidaimi si vilouvakaveka, e matausina kasi luluwai bogwa wala mokwita eitamwau.

⁷Mitaga Guyau Yaubada matauna Guyau tosivagasi, e isaili la takaikaia paila kaboyakala.

⁸E iguyoi valu watanawa metoya ola mitukwaibwaila, e iyakali boda ituwoli ituwoli metoya ola karaiwaga duwosisia.

⁹Guyau matauna kasi tokwala matausina eibodasi kasi lamadada, e ivigaki titoulela kabokwala avai tuta mwau bikaloubusi.

¹⁰Mwa Guyau! Matausina availa availa inikolaimsi bogwa bidubumaimsi. Yoku gala bukuligaiwa matausina availa availa imakaiamsi.

¹¹Kuwosisi kala yakaula Guyau, matauna iguyoi mapilana Saiyoni![23] Kulukwaisi boda kwaitala kwaitala avaka bogwa leivagi!

¹²Yaubada iluluwai availa availa matausina ibodaisi mmayuyu. Gala wala ilumwelavi matausina si nigada, e imipuki availa availa iyogagaisi matausina.

¹³Mwa Guyau! Kunokapisaigu! Kugisi agu mmayuyu avaka agu tilaula eivigakaigusi. Mwa Guyau! Kukolaigu metoya okaliga,

¹⁴e batotu omitasi mina Yerusalem e balivala komwaidona vavagi makwaisina uulela yeigu layakawolaim. E bamwasawa baisa yoku paila lokukolaigu.

¹⁵Matausina gala inikolaimsi ikapusisi omlopu maponinana eikikelaisi, e titoulesi wala iwawaisi okasi sikula.[24]

¹⁶Guyau iyomitali titoulela metoya ola yakala duwosisia, mitaga tomitugaga si bubunela titoulesi ivigaki kasi sikula.

¹⁷Tomitugaga si tuta kala vigimkovila kaliga[25] wala, e makawala goli matausina ipakaisi Yaubada.

¹⁸Matausina si kaisisu mama gala tuta komwaidona biwaki neuya, e matausina tonamakava gala tuta komwaidona bipakaitulaisi si pikwaku.

¹⁹Mwa Guyau! Kuma! Gala bukutagwala tomota bikaluwouwaimsi. Ibodi bukumai matausina gala inikolaimsi bitotusi omatam, e bukuyakali matausina.

²⁰Mwa Guyau! Bukuyokukoli matausina, e kuvigaki binikolaisi mwada matausina tomota wala.