Read Kilivila SAM 90 Bible Online

SAM 90 - Kilivila bible

SAM 90

¹Mwa Guyau! Tuta komwaidona yoku kuvaulaimasi.

²Igau gala kububuli koya, kaina kububuli komwaidona valu watanawa, tokinabogwa yoku Yaubada Tosivagasi, e bukusivagasi makawala, kammwaleta wala Yaubada yoku, tuta gala wala biwokuva.

³Lokububuli tomota metoya opwaipwaia,[201] e kuluki bikaimilavausi baisa. Kuvigaki bimila pwaipwaiasi tuvaila.

⁴Yokugwa kudoki lakatuluwotala taitu makawala kwaitala wala yam, e makawala lova, bogwa leim, kainaga makawala katupotala wala katupwaila bogi.

⁵Kuvigakaimasi bakatamwausi makawala numla, e ma tutasi kala wonaku makawala mimi. Yakamaisi makawala mnumonu kaukwau bisusinasi

⁶e nani wala biluwai e bilala, mitaga koyavi bimwailela e bimata.

⁷Yoku m gibuluwa bikatumtuwolaimasi, e m gidaleiya bivigaki kama kokolasi sainela.

⁸Kusaili ma mitugagasi baisa omatam, e ma mitugagasi makwaisina kakiwolaisi, yoku kusaili omilakatila ambaisa bukugisimlili.

⁹Ma momovasi iutupwi metoya om gibuluwa. Ititamwau makawala butula tiliawai.

¹⁰Paila ma tutasi kweluwolima kweluwoyu taitu wala, kaina goli kweluwolima kweluwotolu, kidamwa topapeula yakamaisi. Mitaga makwaisina taitu kabanaisi wala mwau deli valam. Makateki biwokuva ma momovasi, e bakatamwausi wala.

¹¹Availaga eilumkoli komwaidona m gibuluwa gasisila, e availa inikoli avai kokola bima metoya om gidaleiya?

¹²Kuvitulokaimasi ammakawala ma momovasi kala kwekukupi, kidamwa bakakabitamsi.[202]

¹³Ammakawala m gibuluwa[203] saina kaduwonaku? Avai tuta biwokuva? Mwa Guyau! Bukunokapisaimasi yakamaisi m towotetila.

¹⁴Kaukwau bukuvakasauwaimasi metoya om mitakwai, e oma tutasi komwaidona bakausiwosisi bakamwasawasi.

¹⁵Ibodi tuta baisa bukuyomwasalaimasi, e mwasawa makwaina kala vakaila makawala kala vakaila ninamwau makwaina lokusakaimasi oma tutasi mwau komwaidona.

¹⁶Bukutagwala yakamaisi m towotetila bakagisaisi vavagi makwaisina topilaveka lokuvagi metoya om peuligaga, e igau oluvi ibodi tubumaiasi bigisaisi m peuligaga saina guyugwayu.

¹⁷Mwa! Guyau ma Yaubadasi, ibodi bukumitukwaiyaimasi tuta komwaidona. Bukutagwala bakapeulasi wala komwaidona avaka avaka kauvagaisi.