Read Kilivila SAM 91 Bible Online

SAM 91 - Kilivila bible

SAM 91

¹Availa bilokaia Guyau paila bikwala, e availa Yaubada Topeuligaga bikoli,

²matauna gagabila biluki matauna, kawala, “Yoku agu taboda e agu tokwala. Yoku ulo Yaubada, e yoku goli adubumaim.”

³Matauna biyamataim metoya avai kabosilagi kwekatupwana, e metoya avai lelia saina mwaugaga.

⁴Matauna bivakanunuvaim opinupanela,[204] biyamataim e yoku bukusibwabwaila. Matauna Tokimadagi bikolaim e bitabodaim.

⁵Gala ibodi bukukukoli avai silagi wa bogi, kaina availa biwaim wa yam,

⁶kaina avai lelia biyogagaim odudubila, kainaga avai vavagi mwau bikatumataim lalavi.

⁷Kaina lakatuluwotala bikaligasi otalim, kainaga lakatuluwovila bibodasi kaliga om kwakata, mitaga yoku gala avaka biyogagaim.

⁸Bukumitakavati e bukugisi ammakawala tomitugaga bibodaisi kasi mipuki.

⁹Paila Guyau lokuvigaki m vayoula, e Yaubada Towalakaiwa[205] kam tokwala.

¹⁰Gala avai kabosilagi biyogagaim. e gala avai togigasisi bivakatitaikina om valu.

¹¹Yaubada bisaiki la anelosi kasi pakula[206] biyamataimsi e bikolaimsi ambaisa ambaisa bukula.

¹²Oyumasi bikauwaimsi, taga biwaiya kaikem dakuna.

¹³Bukuvapupoi laiyoni deli keiyuna,[207] laiyoni nagigasisi deli keiyuna naiyayana.

¹⁴Yaubada kawala, “Availa availa iyebwailigusi bakatumovi, e bakoli availa availa idokaigusi Guyau.

¹⁵Avai tuta bidouwaigusi, yeigu bamapu matausina. Avai tuta bibodasi mwau, yeigu basikaili matausina. Bogwa bakoli e balupi okabasi walakaiwa.

¹⁶Yeigu basaiki kasi mapu si momova bakatududuli e yeigu bakoli matausina.”