Read Kilivila SAM 92 Bible Online

SAM 92 - Kilivila bible

SAM 92

¹Mwa Guyau! O ina bwaina bakanokagutokisi baisa yoku, bakawosisi kam taimamila, yoku ma Yaubadasi Towalakaiwa sainela,

²e bakakamitulaisi m mitakwai kaukwau kwaitala kwaitala, deli m kimadagi bogi kwaitala kwaitala,

³deli butula metoya gita e deli butula bwaina sainela wa yuka.

⁴Mwa Guyau! M vavagi topilaveka ivigaki bamwasawa, e ausiwosi deli ulo mwasawa paila uula avaka bogwa lokuvagi.

⁵O Guyau, bogwa layakaula paila avaka avaka bogwa lokuvagi, deli avaka avaka lokuninamsi vavagi topilaveka goli.

⁶Vavagi makwaisina taitala tonagowa gala wala ibodi binikoli, e toninitaboda gala ibodi bitalapula nanola.

⁷Tomitugaga bisusinasi makawala mnumonu, e kaina availa availa matausina ivagaisi sula biyubwailasi. Mitaga bidoumlabasi komwaidosi,

⁸paila yoku wala Guyau Giyoumatala deli Tosivagasi yoku.

⁹Kanikolaisi kam tilaula bikaligasi, deli komwaidona tomitugaga bimamasi.

¹⁰Bogwa lokuvigakaigu bapeula makawala bulumakau nagigasisi. Bogwa lokumitukwaiyaigu kusakaigu mwasawa.

¹¹Yeigu bogwa lagisi si mama agu tilaula deli bogwa lalagi si wakula tomitugaga.

¹²Tomitukwaibwaila bisagusi makawala pulopola, e bikaitubwasi makawala kweisila mapilana Lebanoni.[208]

¹³Matausina makawala kai ivalaisi Guyau ola bwala, makaisina isugusagusi ola Bwala Kwebumaboma da Yaubadasi,

¹⁴e makaisina iuwasi wala kaiuwasi tutala eikaitomoyasi, deli tuta komwaidona kaigigeyata deli kaipapeula.

¹⁵Baisa iyomitali Guyau toduwosisia, e gala kwaitala sula isisu baisa matauna agu tokwala.