Read Kilivila SAM 94 Bible Online

SAM 94 - Kilivila bible

SAM 94

¹Mwa Guyau! Yoku wala Yaubada tomipuki. Kuyomitali m gibuluwa!

²Yoku wala kasi toyakala tomota komwaidona. Mwa! Kutokaia e kusaiki matausina tokaluvalova avaka bibudoki matausina.

³Ammakawala kala woloula tomitugaga bimwasawasi? Ki, Guyau - ammakawala kala woloula?

⁴Ammakawala kala woloula tosula bikaluvalovasi wala, deli bikamnomwanasi paila si sula?

⁵Mwa Guyau! Matausina ikatugigaiyaisi m tomota, e ilamidadaisi matausina metoya om boda.

⁶Ivakaligaisi kakau deli weilova, deli ikatumataisi tomitawasi availa availa isisuaisi oma valusi.

⁷Matausina ililivalasi, kawasi, “Tauwau! Guyau gala wala igigisaidasi. Mina Isireli si Yaubada gala wala ivitusaidasi!”

⁸Ulo tomota, ammakawami yokomi saina toninagowa yokomi? Ki, avai tutaga ibodi bitapuloki ninami?

⁹Yaubada ibubuli taigadasi - ki, sitana ililagi? E ibubuli mitadaisi - ki, sitana igigisi kaina?

¹⁰Matauna ikaraiwogi boda ituwoli ituwoli - ki, ibodiga bimipuki matausina? Matauna kasi tovituloki tomota komwaidona - ki, sitanaga la kabitam kaina?

¹¹E Guyau bogwa leinikoli avaka eininamsaisi. E inikoli ammakawala kala nigonigwa si bigatona.

¹²Mwa Guyau! Tomota matauna lokukwatululuti bimwasawa sainela, e matauwena goli lokuuvituloki m Kwaraiwaga!

¹³Yoku kuvigaki matauna bivaiwasi ola tuta mwau, e bila goli avai tuta bikelaisi nobwala paila kasi silagi matausina tomitugaga.

¹⁴Guyau gala bisilavi la tomota, e gala bisilavi matausina availa availa metoya ola boda.

¹⁵Karaiwaga duwosisia igau bitabani metoya okaboyakala, e deli komwaidosi tomota tomitukwaibwaila bipilasaisi makwaina.

¹⁶Ki, availa itokailagu tutala eikoulovaigusi tomitugaga e availa ipiaigu tutala ikoulovaigusi tomitugaga?

¹⁷Kidamwa goli Guyau gala bipilasaigu, kagu yam bogwa lalobogwa mapilana Tuma.

¹⁸Yeigu lalivala kawagu, “Mwa Guyau! Lakakapusi!” Mitaga m mitakwai ivisimiliwolaigu.

¹⁹Avai tutaga aninayuwa deli anokubukubu, yoku kuvisimolaigu deli kuyomwasalaigu.

²⁰Yoku kupaiki matausina toyakala totabilibili. availa availa matausina ikoukikitasi baisa yakala doudoga, mwada yakala duwosisia,

²¹e availa availa ikikeiwalasi bitabinakaisi tobubwaila. e ikamogaisi tobubwaila paila bikaligasi.

²²Mitaga Guyau itabodaigu, e ulo Yaubada ikolaigu.

²³Matauna igau bimipuki matausina paila si mitugaga sainela e bikatudoum matausina paila si mitugaga. Guyau da Yaubadasi bogwa bikatudoum matausina.