Read Kilivila BIGIVAKALA 1 Bible Online

BIGIVAKALA 1 - Kilivila bible

BIGIVAKALA 1

¹Makwaisina la bigivakala Solomoni, matauna Debida latula, e guyoula Isireli.

²Ka, baisa bukubanaisi mimilisi bigivakala bipilasaimi kidamwa bukuvitusaisi kabitam deli katuloluta bwaina, e bukukwatetasi makwaisina bigivakala kasi katumiki saina mwau.

³Mabigasina bivitulokaimi ammakawala mi kaisisu kala kabitam, deli ammakawala bukububunasi kamokwita deli duwosisia e deli sigilibwaila.

⁴Mabigasina ibodi bivigaki tobubeikam bikabitamsi, deli bivituloki tubovau bikabitamsi paila avai vavagi avai vavagi.

⁵E ka, tuvaila mabigasina gagabila bikatumkulovi tokabitam si kabitam, e bivakadi matausina toninitalapula,

⁶kidamwa bikatetasi bigivakala kala bigikium kainaga kala katumiki, e deli bikatetasi makwaisina vavagi mwau avaka avaka tokabitam isusunupuloiyaisi.

⁷Kidamwa magim bukukwabitam, ikugwa bukukwamiabi Guyau.[1] Toninagowa gala ikaiki uwosi paila kabitam, deli ipakaisi vituloki.

⁸Latugu,[2] kunakaigali avaka tamam deli inam bilukwaimsi.

⁹Si vituloki bikatumkulovi m bubunela kala bwaina, makawala butia kaina kuwekuwa bikabwaili kam gigisa.

¹⁰Latugu, avai tuta mina mitugaga bitamnabaimsi, taga kukouyagila.

¹¹Kidamwa bilukwaimsi kawasi, “Mwa! Kuma, bitanevaisi availa bitakatumataisi. Tamwaisi, tawomakaiyaisi tobubwaila paila wala yousokana!

¹²Avai tuta bitabanaisi matausina, kaina bibwabwainasi, mitaga avai tuta bitavigimkulovaisi avaka da nanamsasi, matausina tokukwaliga wala.

¹³Bitabanaisi bidubadu guguwa ituwoli ituwoli, deli bitavakasauwaisi da bwalasi avaka bitalebwaisi.

¹⁴Kuma kutoulala oma deilisi e bitavilaisi avaka bitaveilauwaisi.”

¹⁵Latugu, taga kuvakatu tomota makawala matausina. Kusibem metoya baisa matausina.

¹⁶Matausina saina magisi nanakwa bivagaisi kwaitala vavagi gaga. Matausina tuta komwaidona ninasi ititobogwa paila katumata.

¹⁷Gala bwaina bitaleiya sikula avai tuta minana mauna bigigisi avaka tauvagi.

¹⁸Mitaga tomota makawala matausina ilaleiyasi kasi sikula titoulesi, e wa sikula makwaina bikaligasi.

¹⁹Bubunela lebu tuta komwaidona bikatumati tolibulebu. Baisa makawala ikikaloubusi baisa matausina mbwailisi yowai.

²⁰Kunakaigalaisi! Kabitam ikatuwola wa keda deli obikubaku.

²¹Ikaigivakaveka okalapisilela valu[3] deli ambaisa tomota si kabosigugula.

²²Kawala, “Yokomi toninagowa. Ammakawala kala kaduwonaku magimi bukuninagowasi? Ammakawala kala kaduwonaku deli mi mwasawa bukuyosokanaisi kabitam? Ki, gala gagabila sitana bitalapula ninami?

²³Kunakaigalaisi avai tuta bakamitilakaimi. Bakatululutaimi, deli bakamituli ulo kabitam baisa yokomi.

²⁴Bogwa ladouwaimi, lawitali kami kaikivi bukumaisi, mitaga gala wala sitana kunakaigalaisi ulo dou. Gala kunakaigalaisi avaka lalukwaimi.

²⁵Bogwa kukoulovaisi komwaidona ulo katuloluta, deli gala magimi bukutagwalasi yeigu bakiduwosisiaimi.

²⁶Mapaila kidamwa bukubodasi mwau, yeigu bagigilaimi. Avai tuta kabovitukokola bima, avai tuta bimakaiami makawala utuyagila e bukubodasi mwau makwaina makawala yagila ikatugisisi, e yokomi bukusisuaisi ommayuyu deli oninamwau, e ka, yeigu bayosokanaimi.

²⁸E bukudousi paila kabitam, mitaga yeigu gala batama. Kaina bukunevaigusi ambaisa ambaisa, mitaga gala bukubanaigusi.

²⁹Yokomi kuvigakaisi kabitam makawala gala wala avaka dimlela, deli tuta komwaidona kupakaisi bukukwabikuwolaisi Guyau.

³⁰Bogwa kukoulovaisi komwaidona ulo katuloluta, e gala avai tuta kunakaigalaisi avaka lalivali tutala lakiduwosisiaimi.

³¹Mapaila bukubodasi avaka mapula mi sula, deli titoulemi mi vavagi bogwa bibulokatuwolaimi.

³²Tobubeikam ikaligasi paila ipakaisi kabitam. E toninagowa idoumlabasi paila uula idokaisi kabitam gala avaka dimlela.

³³Mitaga availa inakaigalaigu bisisu okabokwala. Matauna bikwala e gala wala avaka uula bikokola.”