Read Kilivila BIGIVAKALA 2 Bible Online

BIGIVAKALA 2 - Kilivila bible

BIGIVAKALA 2

¹Latugu, kutakutu avaka lavitulokaim e gala avai tuta bukulumwelavi avaka lalukwaim bukuvagi.

²Kunakaigali avai kabitam e kuvigikoni bitapuloki nanom.

³E ibodi bukuyokakapisi paila ninitalapula deli bukukwayubabai paila katavatu.

⁴Kunevi paila makwaisina makawala kala nevi siliba kaina avai veiguwa kwekatupwana.

⁵E kidamwa bukuvagi makawala, bogwa bukubani ammakawala bukukukoli Guyau, e bukupeula kala nikoli Yaubada.

⁶E Guyau wala matauna kabitam kala tosaiki, e ninitalapula deli nikoli leimaima metoya baisa wala matauna.

⁷Matauna isisaiki pilasi deli kabokwala baisa tomota tomitukwaibwaila deli tokamokwita.

⁸Matauna ikoli availa availa matausina iuvagaisi bwaina baisa sesia, deli iyamati availa availa matausina itugwalaisi titoulesi baisa matauna.

⁹Ka, kidamwa bukunakaigalaigu, bogwa bukunikoli avaka ibodi uvagila kala bwaina, deli duwosisia. E bogwa bukunikoli avaka ibodi bukuvagi.

¹⁰E yoku bukukwabitam, m nikoli bivigaki m kwabomwasawa.

¹¹M kwatavatu deli m nikoli baisa bikolaimsi

¹²deli bisilibodaimsi metoya avaka uvagila gaga. E vavagi makwaisina bivalailimsi metoya matausina eiyomatulasi pakula metoya osi bigatona -

¹³matausina goli bogwa eisilavaisi bubunela mitukwaibwaila kidamwa bisisuaisi odudubila baisa mitugaga,

¹⁴matausina ibanaisi si kabomwasawa paila biuvagaisi mitugaga deli iyebwailisi avai vavagi gagawokuva wala,

¹⁵tomota matausina gala kabonakusi deli gala wala kasi dubumi.

¹⁶E yokugwa gagabila bukukolaim baisa avaivila namitugaga, minawena ivigikoni kidamwa bitavili nanom metoya ola katudabuma,

¹⁷minawena ilumwelavi wala la biga katotila kwebumaboma, e ivakikili wala la mwala.

¹⁸E kidamwaga bukulokaia ola bwala, yoku bogwa bukuliloula okedala kaliga. Kidamwa bukulokaia makadana, e bogwa bukuvakatitaikina baisa wa Tuma.

¹⁹Ka, matausina availa availa eilokaiasi minana, gala wala avai tuta bikaimilavausi. E matausina gala avai tuta bikaimilavausi baisa okedala momova.

²⁰Mapaila ibodaim bukusisu olopola mitukwaibwaila e bukuliloula osi deili tomitukwaibwaila.

²¹Matausina tomitukwaibwaila - matausina tobubwaila - bisisuaisi baisa oda valusi.

²²Mitaga Yaubada bibisabu tomitugaga deli bilulu tosulosula metoya ovalu, makawala goli kala sabu mnumonu opwaipwaia.