Read Kilivila BIGIVAKALA 23 Bible Online

BIGIVAKALA 23 - Kilivila bible

BIGIVAKALA 23

¹Avai tuta bukusili bukukwamsi som taitala todabala, kuvitusi availa matauna.

²Kidamwa togugoveka yoku ibodi bukuninalem titoulem.

³Gala bukugugoveka paila kalamatabwaila eikatubiasi; paila kaina matauna eivigikoni mwada bisinapwaim.

⁴Ibodi bukukwabitam bibwaina, e taga bikaiki wowom kala savali guguwa bidubadu.

⁵Kaina m guguwa kala wokuva saina nanakwa sainela, makawala goli isim pinupanela biyowa bila makawala mluveka.

⁶Gala bukukwamsi kamitaiyu tau matauna tokikila kaina bukugugoveka paila kalamatabwaila eikatubiasi.

⁷Matauna bilukwaim kawala, “Mwa, kukwam tuvaim,” mitaga gala nanola makawala. Ka, avaka idoki titoulela onanola, baisa goli la bubunela mokwita.

⁸Igau bukulagobi avaka bogwa lokukoma, e komwaidona m yakaulubwabwasi gala wala dimlela.

⁹Gala bukuyomadi m bigabwaila baisa matauna tonagowa; paila gala wala bikabwaili m bigatona.

¹⁰Gala avai tuta bukukobili kaitala kaibogwa tokulumwala kaina bukuyouli si pwaipwaia matausina wailova.

¹¹Paila Guyau Topeuligaga matauna kasi taboda, e deli bipii matausina e bikagagaimga.

¹²Kumanum baisa kam tovituloki e bukutakutu komwaidona avaka bukulagi.

¹³Gala bukuninayuwa paila bukuvituloki latum. Kidamwa bukuvituloki wa lewa galaga bikaliga.

¹⁴Mitaga ka, kala siligaga sainela kidamwa vituloki makwaisina kaina bikoli la momova.

¹⁵Latugu kidamwa bukukwabitam e yeigu saina bamwasawa.

¹⁶E ulo mwasawa bikalisau avai tuta balagaim bukulilivala deli m kwabitam.

¹⁷Gala bikau nanom tomota tomitugaga; mitaga kutemmali Guyau e baisa bivigaki uulela m sisu.

¹⁸Kidamwa bukuvagi makawala, e tuta oluvi bukuyubwaila.

¹⁹Latugu, kunakaigalaigu! Ibodi bukukwabitam e nanom bisakauloki ammakawala m kwaisisu.

²⁰Gala bukuvakatu tomota matausina saina tomomom waini kaina togugoveka.

²¹Paila tomomom sainela deli togugoveka igau bigweiluvasi. Kidamwa bukuyokulokaim kamkwam wala deli masisi, e tuta pikekita bukusikam yadidadaimi wala.

²²Kunakaigali tamam la biga, paila kidamwa gala matauna, yoku gala tomota. Avai tuta inam binumoya, kukwamiabi minana.

²³Makwaisina kamokwita, kabitam, kamitabubula deli nikoli, ibodi bukudoki veiguwatoula, e saina mwau availa bigimolivau metoya baisa yoku.

²⁴Matauna tomitukwaibwaila ivigaki tamala la mwasawa. Ibodi bikavisi latula kidamwa matauna tokwabitam.

²⁵Kuvigaki tamam deli inam bikavisaimsi. Ibodi inam bibani mwasawa makwaina.

²⁶Latugu, kulamam e bukunakaigalaigu, deli ibodi bukuvitusi ulo kidakeda.

²⁷Minasina nakalimwala deli nakakailasi baisa isisu sikulela kaliga.

²⁸Minasina bititobogwasi wala paila yoku makawala tolibulebu, e bivigakaisi bidubadu tauwau biyogagaisi si kaukweda.

²⁹Kuvitulokaigu availa tomomom siligaga, availa idoki bivigikoni mimilisi kaiuwovau kaimomom, e igau yeigu balukwaim ammakawala matauna la sisu gewagewa deli kala lumkola gaga deli la ninamwau. Tuta komwaidona iyomituli pakula deli la takulukulu. Matala kwebubweyani deli kala lewa manosina mwada ibodi biyobwi, bogwa eikatubwauwaisi wowola.

³¹Gala bikau nanom waini, kaina goli kala gigisa saina bweyanigaga, deli bivivivila wa viga e saina manum bisalili wa kailia.

³²Mitaga igau biyam kaukwau bukulumkoli makawala natana keiyuna yayanela bogwa eigadaim.

³³Matam bibiliuya e gala igagabila bukunanamsa kaina bukulivala duwosisia.

³⁴Igau bukulumkoli makawala okusisu omilaveta, e eiwaiwaim kaisai wa waga, e ibulokatuwolaim.

³⁵E bukulivala kawam, “Kaina goli avaka bogwa leiwaigu! Kaina goli eigimsisaigusi mitaga gala wala aluluwai! Avaka paila gala igagabila bamamata? Ibodi magigu bamom tuvaila.”