Read Kilivila BIGIVAKALA 30 Bible Online

BIGIVAKALA 30 - Kilivila bible

BIGIVAKALA 30

¹Mabigasina Aguri la biga mwau matauna Yakei latula. “Yaubada gala isikailigu, Yaubada gala isikailigu, mapaila yeigu bogwa lamama.

²Yeigu makawala natana wala mauna e gala makawala tomota; deli nanogu gala wala makawala tomota ninasi.

³Gala avai tuta atakutu avai kabitam deli gala sitana anikoli Yaubada.

⁴Tauwau! Availa sitana ikabitam labuma kala nikoli? Kaina availa sitana ikipatu yagila oyamala? Kaina ikapoli sopi okarekwa? Kaina isaili kaligeila valu watanawa komwaidona? Mwa! Kidamwa kunikoli kulukwaigu, ki, avai tau matauna? E avai tau latula?

⁵“Yaubada iuvagi komwaidona avaka la biga katotila. Matauna makawala vayoula, e matausina availa availa ilokaiasi matauna bogwa bikwalasi.

⁶Kidamwa bukukwatusai avaka eilivali, matauna bikamitilakaim e bibanaim yoku tosasopa.”

⁷Mwa Yaubada anigadaim magigu bukutagwala bukusakaigu kwaiyu vavagi, e oluviga bakaliga.

⁸Kwaitala, kuyamataigu taga basasopa, e kwaiyuwela, bukutagwala ulo kaisisu bibodaigu wala. Mapaila kusakaigu kʹagu avaka wala bibodaigu.

⁹Paila kidamwa ulo kaisisu saina migamaga igau kaina bakaluwouwaim. Mitaga kidamwa bikatukwakavaigu ogu kwaukweda, igau baveilau e bogwa bayomsilaim yoku ulo Yaubada.

¹⁰Gala avai tuta bukukwavilivili taitala touwata baisa kala tokugwa. Paila igau bibulotaim e bukuboda mmayuyu.

¹¹Mimilisi tomota ikavilivilaisi tumisia, deli gala ikabikuwolaisi inisia.

¹²Mimilisi tomota idokaisi matausina tomigileu, mitaga pupagatuwokuva wala.

¹³Mimilisi tomota idokaisi wala bogwa tobubwaila - wa, oninasi idokaisi wala bogwa bwaina!

¹⁴Mimilisi tomota ititakunasi si kaisisu metoya osi lamadada deli vakatutuki baisa tonamakava deli togumalawa.

¹⁵Nigadakakata litula nayu, e nayu wala yagasi, “Kusakaigu!” Kwaivasi vavagi makwaisina gala avai tuta bikatulokasi,

¹⁶Tuma, vivila nakaliga, butumala magila kuna, e kovasupa.

¹⁷Availa bikatudeu tamala kaina bivakadoli inala bogwa eivinumoya, ibodi wala mluveka bikomasi matauna, kaina kilakila bitapwesaisi matala.

¹⁸Isisuaisi kwaivasi vavagi makwaisina saina kweninigonigwa paila bakateta.

¹⁹Natana mluveka iyoyowa ogawata, natana keiyuna isigisagina odakuna, kaitala waga inainevi la keda obolita, deli tau sola vivila ivitouulasi si kalubaila.

²⁰La bubunela vivila minana nakomlilipwa baisa makawala. Bila ikailasi, e oluvi bima ikayawisi bim, e bikaibiga kawala, “Mitaga gala wala avai sula avagi!”

²¹Kwaivasi vavagi makwaisina ovalu watanawa gala ikwani valu watanawa bitugwali.

²²taitala ula biguyau, taitala tonagowa biyosi komwaidona avaka magila bikoma,

²³natana naseputupwatula bivai, deli natana ula biyouli kabala la giyouvila.

²⁴Minasina navasi mauna nakikekita baisa ovalu watanawa, mitaga saina nakabitam.

²⁵Lata. minasina saina namamama, mitaga idadodigasi kʹasi otutala milamala.

²⁶Kwakwau. minasina makawala gala napapeula, mitaga iiniyenisi kasi nobwala opapala dakuna.

²⁷Nipawa. minasina gala isim si guyau, mitaga komwaidosi wala biyoyowasi gulitinidesi.

²⁸Ulau. ibodaida wala bitayosi minasina oyamada, mitaga gagabila bitabani minasina wa ligisa.

²⁹Vavagi kwaivasi makwaisina itututu nona avai tuta bitagisi bililoulasi.

³⁰laiyoni, saina napeuligaga odubasi mauna komwaidona, e deli gala avai mauna bikukoli;

³¹namwala gota, e minana rekorekwa la kailoula, deli goli gweguya bivamnakasi omitasi kasi viloumgwa.

³²Kidamwa lokuninagowa wala kaluvalova deli bukuninamsi mitugaga, desi kukwapatu e bukunanamsa bibwaina!

³³Kidamwa bukuvakamenu kunaita, bukubani pwapwa. Kidamwa bukuwaiya som kabulula, biviloubusi buyavi. Kidamwa bukuvitoumwala gibuluwa bogwa bukuboda mwau.