Read Kilivila BIGIVAKALA 31 Bible Online

BIGIVAKALA 31 - Kilivila bible

BIGIVAKALA 31

¹Mabigasina guyau Lemueli inala la biga katuloluta baisa matauna, kawala.

²“Yoku latugu tombwailigu, e yoku ulo nigada mapula. Ki avaka balukwaim?

³Gala bukuyomadi m peula komwaidona metoya okanavai deli vivila, e deli m mani paila bukubuwi vivila; minasina eivakapusiaisi gweguya.

⁴Ka! Lemueli, kunakaigalaigu. Gweguya gala ibodi bimomsi waini kaina bikasigwaba kaiyasi paila avai sopi kaipeula.

⁵Avai tuta bimomsi, bogwa bilumwelavaisi karaiwaga deli bipakaisi binevaisi avaka bibodi si kaisisu availa availa matausina eibodasi mwau.

⁶Sopi kaipeula makaina biboda paila availa matausina bogwa bikaligasi, deli paila availa matausina eibodasi mwau.

⁷Ibodi matausina bimomsi, e bilumwelavaisi si namakava deli si ninamwau.

⁸“Yoku udosi matausina availa availa togum. Kukoli si kaisisu availa availa matausina tomamama.

⁹Bukulivala paila matausina deli bukugiyoubwaila. E bukukoli si kaisisu tonamakava deli togumalawa.”

¹⁰Saina mwau ammakawala taitala bibani natana napwaitukula bivigaki la kwava. Minana kala bwaina ikalisuwoli veiguwa komwaidona.

¹¹La mwala idubumi minana, e gala avai tuta bitonamakava.

¹²Makawala kala kaduwonaku minana la momova, tuta tuta iuvagi bwaina wala baisa la mwala, e gala avai tuta biyomiyuyu matauna.

¹³Minana saina naiyoudila wala tuta tuta ibisibasi karekwa metoya unuunula sipi deli wotunu yakakalaia.

¹⁴Makawala waga kaigigimwala ivigakaisi, makawala goli minana imai kaula ola bwala metoya ambaisa ola tapwala.

¹⁵Igau wala bulubuvisiga minana bogwa bimamata paila bisulu kasi kuleya litula deli biluki la ula vivila avaka bivagaisi.

¹⁶Minana ivakawoli pwaipwaia e bogwa igimoli. Metoya avai mani eiwotitali, minana ivali matamsina waini bigulela.

¹⁷Minana saina nakaibagula, napeula e deli napwaitukula.

¹⁸Minana ininikoli avaka kala mwau vavagi komwaidona avaka iiyouduli, e tuta komwaidona biiyoudila wala bilubulotoula.

¹⁹Minana titoulela wala biiyaula la werikudu e bivituvatu dabela titoulela wala.

²⁰Minana saina namitakwai tuta komwaidona eipipilasi tonamakava.

²¹Minana gala wala ininayuwa paila avai tuta numla saina tula la tuta, paila veyala bogwa iyosisi kaikwala.

²²Minana ibisibasi moi paila kabokanukwenu, e deli isisikam doba kala vau yabubweyani.

²³E minana la mwala yagala igaveka, e matauna taitala kaidadala valu.

²⁴Minana ivituvatu doba deli iwawai wakala, e igigimoli baisa togigimwala.

²⁵Minana saina napeula e deli nakamaiaba, e deli gala ikokola paila tuta bima.

²⁶Minana ililivala biga manum deli la kabitam.

²⁷Minana tuta komwaidona ipupaisewa deli iyamati avaka bibodi la kaukweda.

²⁸Litula ikamiabaisi minana, e la mwala ikavisi minana.

²⁹E matauna ilivala, kawala, “Bidubadu nunumoya vivila bwaina, mitaga yoku saina kusiligaga kukwalisuwoli komwaidosi!”

³⁰Bubunela manum mimilisi tuta bivigaki tiganini, e namitabwaila igau bikala wowola. Mitaga avai numoya idubumi Guyau, ibodi minana bibani kala yakaula.

³¹Ibodi bukuyakawolaisi minana paila komwaidona avaka avaka eiuvagi. Minana iboda bibani kala taimamila metoya baisa tomota komwaidosi.