Read Kilivila BIGIVAKALA 4 Bible Online

BIGIVAKALA 4 - Kilivila bible

BIGIVAKALA 4

¹Ka litugwa, kunakaigalaisi avaka tamami eivitulokaimi. Kumanumsi e bitapuloki ninami.

²Avaka avaka lavitulokaimi baisa saina bwaina, mapaila ibodaimi bukululuwaisi makwaisina vavagi komwaidona.

³Igau gwadi yeigu, agumwaleta wala deli veyagwa,

⁴e tamagu iuvitulokaigu wala. E ilulukwaigu kawala, “Ka, kululuwai avaka lalukwaim, e gala avai tuta bukulumwelavi. Bukuvagi avaka lalukwaim, e bukusisu bwaina.

⁵Bukuyosi kabitam deli katavatu! Gala bukulumwelavi kaina bukupaiki avaka lalivali.

⁶Gala bukusilavi kabitam, paila kabitam ibodi bikolaim. Kuyebwaili kabitam, e kabitam wala ibodi biyamataim e bukusisu bwaina.

⁷Kala siligaga sainela bukuyosi kabitam wala. E kaina goli avaka tuvaila magim, e bukuyosi katavatu wala.

⁸Bukuyebwaili kabitam, e kabitam wala bivasiganaim bukutodabala. Bukuyobobu kabitam, e kabitam wala bimiakaim kam taimamila.

⁹E kabitam wala bivigaki kam mmakata.”

¹⁰Latugu, kunakaigalaigu, e kuligimlili avaka lalukwaim, e m momova bikatududuli.

¹¹Yeigu bogwa lavitulokaim kabitam, deli ammakawala bukusisu bwaina.

¹²Kidamwa bukuliloula deli m kwabitam, gala wala avai vavagi bitobodi m keda, deli avai tuta bukusakaula gala wala bukusilubeibeu.

¹³Tuta komwaidona bukululuwai avaka bogwa lokutakutu. Paila m kwabitam baisa m momova - mapaila kuyamati bibwaina.

¹⁴Gala bukulokaia ambaisa tosulosula eilokaiasi, deli gala bukubokuli tomitugaga si kedakeda.

¹⁵Kuleila metoya mitugaga! E gala bukuvagi makwaina. Bukupaiki e bukusaitaula wala om keda.

¹⁶Tomota tomitugaga gala ibodi bimasisisi tatoula wala bivagaisi sula. Matausina bibuliyatasi tatoula wala biyogagaisi avai tomota.

¹⁷Paila mitugaga deli yommayuyu ivigakaisi makawala kʹasi deli kasi sopi.

¹⁸Keda makadana tomitukwaibwaila eilalouyasi makawala kalasia la yuwoula, eiyuwoula, eipelama, e eipokala valu.

¹⁹E kavilelaga biga tomitugaga si keda kadadudubilʹo, makawala bogi dudubalela. Matausina ikikapusisi mitaga gala ivitokaisi tolosila avaka eitokailasi e eisilubeibeusi.

²⁰Latugu kumanum e kunakaigali avaka lalilivala. E kunakaigali ulo biga.

²¹E gala avai tuta bukukilavi biga mabigasina. Bukululuwai mabigasina e bukuyamati bisisuaisi onanom.

²²E mabigasina goli bisakaisi si momova, deli bivitubwi matausina availa availa itapuloki ninasi.

²³Ka, kuyamataim avaka bukuninamsi; paila metoya goli m nanamsa bibubuli m momova.

²⁴E gala avai tuta bukulivala avai vavagi sopa. E gala bikau nanom sopa deli wabu.

²⁵Bukudubakaiwa wala deli m tuvaluwa mokwita, e gala bukusilimwagudu deli kam mmosila.

²⁶Kunanamsa bibwaina paila avaka bukuvagi e ammakawalaga bukuvigaki, kidamwa bisunapula kala duwosisia.

²⁷Kuvapupali mitugaga e bukusaitaula wala om keda. E gala bukutagwala kweyatala bakwaim bisuwelu metoya keda duwosisia.