Read Kilivila BIGIVAKALA 6 Bible Online

BIGIVAKALA 6 - Kilivila bible

BIGIVAKALA 6

¹Ki latugu, bogwa kukwatotila mwada bukumapu availa availa kasi wasi ke?

²Ki om biga titoulem bogwa eiwawaim, e kuvisilagaim metoya om biga katotila kadai?

³O ka latugu, yoku bogwa lokusisu oyamala matauna, mitaga baisa makawala bukuvagi paila bukuyuvisaim metoya pakula makwaina. Nani bukulokaia matauna e kuyokakapisi baisa matauna kidamwa bitanekwaim.

⁴E gala bukumasisi kaina goli bukuvaiwasi.

⁵Ibodi bukuyuvisaim metoya pakula makwaina makawala mauna eiyoyowasi kaina diya eisisakaulasi metoya towaiga.

⁶Ibodi tobigumata bimitakavataisi ammakawala si kaisisu lata.

⁷Lata gala isim kasi tokugwa, si guyau, kaina kasi tokwaraiwaga,

⁸mitaga ikatugugulaisi kʹasi okweluvala kaula e ikatubaiasasi paila tutala molu.

⁹Ammakawala kala kaduwonaku paila tobigumata bikanudubaduba? Avai tutaga bitokaia?

¹⁰Matauna bilivala, kawala, “Igau sita akipu matagu. Bakatukwaibobu e bavaiwasi pikekita.”

¹¹Mitaga saina masisi matauna bigweiluva, e molusaula biyogagi matauna makawala tolibulebu.

¹²Tomota tomitugaga gala dimlesi, bititavinasi wala bisisasopasi.

¹³Matausina imitikipoisi deli ititageunasi mwada biwabwaimsi,

¹⁴tuta komwaidona matausina ninasi doudoga wala, mapaila ininamsaisi sula wala e iyoulavekaisi pakula ambaisa ambaisa.

¹⁵Paila baisa makawala, kabommayuyu bisikaila matausina gala yolibiga, e gala ibodi bitakatumovi.

¹⁶Kwailima kwaiyu vavagi Guyau kwekukolola, e gala wala bitagwala bigisi.

¹⁷Gisimnaka, udomomola, yamila makweyasina ikipwasasi tobubwaila buyavisi,

¹⁸ninalela mitugaga, kwai ivananakwa paila bivagi mitugaga,

¹⁹matauna tobigavila, e matauna tosilapulu biyogagi si kalubaila sala.

²⁰Latugu, kuvagi avaka tamam eilulukwaim deli gala avai tuta bukulumwelavi avaka inam eivitulokaim.

²¹Tuta komwaidona si biga bukuyamati deli kukwatukikiti mabigasina onanom.

²²E veyamwa si vituloki baisa bivakadaim om tuta kwaidadina, bikolaimsi wa bogi, deli bikatululutaimsi wa yam.

²³Paila si katuloluta makawala kaitapa isim visigala, e si katuwola baisa yoku ibodi bivakadaim ammakawala bukusisu bwaina.

²⁴Mabigasina ibodi bivaleilimsi metoya vivila gaga, deli si kukova tauwau ituwoli metoya osi katudabuma.

²⁵Taga bikau nanom metoya okasi naminabwaita deli taga bukukouyagila metoya osi tagwala.

²⁶Taitala tau ibodi wala bibuwi kwaitala buwa baisa natana nakalimwala; mitaga paila kailasi bikasau wala la kaisisu.

²⁷Ki ibodi bukukwaipapi kova ovitakom e kudoki galaga bigabu kam kwama ke?

²⁸Ki, ibodi bukuloula odabala pwanosi eikapolu e kudoki galaga bigabu kaikem ke?

²⁹Baisa bogwa wala makawala bukusilagi kidamwa bukumisii som la kwava. E availa availa bivagaisi makawala, bogwa bibodasi mmayuyu.

³⁰Tomota gala ikoulovaisi matauna iveilau kaula avai tuta ikamolu;

³¹mitaga kidamwa avai tuta biyosisi matauna touveilau ibodi wala matauna bimapu sivalima sivayu avaka leikau - e ibodi bisaiki komwaidona la guguwa avaka leiyosi.

³²Mitaga matauna tokakailasi gala wala isim nanamsela. E titoulela wala iuvisilagi.

³³E gala bitemmalaisi matauna biwaiyasi wala; e kala mmosila wala bikatumati.

³⁴E tau tovavaigila la gibuluwa saina siligaga avai tuta biuliweli gala makawala gibuluwamakava, e avai tuta bikeula lugwala, gala wala inikoli avai tuta bisim.

³⁵E gala ibodi bitagwala bikau avai lula; kaina avai bobwailila paila kiminumla nanola.