Read Kilivila BIGIVAKALA 7 Bible Online

BIGIVAKALA 7 - Kilivila bible

BIGIVAKALA 7

¹Latugu, kululuwai avaka lalivali, e gala avai tuta bukulumwelavi avaka lalukwaim bukuvagi.

²Kuvagi avaka lalukwaim e bukusisu bwaina. Kuyamataim bibwaina e bukubokuli ulo vituloki, makawala lokuyamati matam.

³Kuyamati ulo vituloki makawala kam kakalougwa tuta komwaidona; e kugini makwaina onanom.

⁴Kabitam bukuvigaki lumta, e ninitalapula lubaim tatoum.

⁵Paila makwaisina bileilimsi metoya tauwau ituwoli si kukova, deli metoya vivila ituwoli osi katudabuma.

⁶Kwaitala tuta ogu bwala alavi matagu metoya owinidowa,

⁷e agisi bidubadu tauwau tubovau tobubeikam. Mitaga avitusi taitala tonagowa oluwalaisi.

⁸Matauna ililoula wa keda katitaikina okatugulugwelu, ambaisa natana vivila eisisu. Matauna ilokaia katitaikina la bwala minana,

⁹odubilikoyavi bogwa eidudubila.

¹⁰E minana ibodi matauna. Minana ikatubaiasa makawala natana nakalimwala deli ininanamsa avaka nanola bivagi.

¹¹Minana natuvigaki wala deli gala wala inikoli mmosila, e minana tuta komwaidona biuweiyei wala.

¹²Mimilisi tuta bitobogwa itulotula okatugulugwelu, e mimilisi tuta wa keda, e mimilisi tuta obikubaku.

¹³Minana ilavi yamala ikaipapi matauna totubovau, iviyuwoli matauna e igisamapusi e ikaibiga, kawala,

¹⁴“Mwa! Bogwa lavagi ulo semakavi lagaila deli kesala viliona[4] metoya wa lula ogu bwala.

¹⁵Mapaila lasunapula laninevaim. Yeigu magigu babanaim, e ka! - mayoku!

¹⁶Bogwa layai kanunuva okabagu miyasina yaginigini metoya Itipita.

¹⁷Bogwa lakatusoki vavagi simasimina metoya mro, lileikoya deli gau.

¹⁸Yo! Kuma! Tam takanavai. Da yobobu bivigaki da mwasawa.

¹⁹Ulo mwala gala isisu wa bwala. Bogwa leilʹo ikwaidadina kaduwonaku.

²⁰Bogwa eikau mani bidubadu leilau, deli gala bima olopola kwaiyu wiki.”

²¹Mapaila minana bogwa itavili nanola matauna metoya ola tainona, e matauna ikouyagila wala, paila minana saina nakatudabuma bigatona.

²²E saina nanakwa matauna ilokaia minana makawala natana bulumakau bilauwaisi paila bikatumataisi, kaina makawala natana dia ivatunetuna bila wa sikula olumoulela,

²³ambaisa kaiyala bibisimati minana. Matauna makawala mauna bila wa sikula. Paila matauna gala inikoli bogwa isisu osilagi.

²⁴Baisa tuta litugwa kunakaigalaigusi. Kukwatukovaisi taigami bukunakaigalaisi avaka balivali.

²⁵Taga kutagwalasi natana vivila makawala minana bitavili ninami. Taga kuvakulaisi minana.

²⁶Minana bogwa iyogagi tauwau bidubadu e iyomituli kasi kaliga saina bidugaga gala gagabila bitakalau.

²⁷Kidamwa bukulokaiasi minana ola bwala, baisa bogwa lokuliloulasi okedala Tuma. Paila baisa kaduvapoi kedala bilokaia kaliga.