Read Kilivila BIGIVAKALA 8 Bible Online

BIGIVAKALA 8 - Kilivila bible

BIGIVAKALA 8

¹Ka, kunakaigalaisi - kabitam idoudou. Nanamsa duwosisia ikaigivakaveka mwada availa bilagi.

²Itotu wa koya e osiusiula keda, e tuvaila okadilalavi.

³Itotu okadumilagela valu, e opapala kalapisila[5] idoudou kawala,

⁴“Yokomi tomota komwaidomi, kunakaigalaigusi! Adoudou baisa komwaidomi mina watanawa.

⁵Yokomi toninitaboda ibodi bitalapula ninami. E yokomi toninagowa ibodi bukunanamsasi duwosisia.

⁶Kunakaigalaisi ulo biga saina bwainigaga. Komwaidona avaka alukwaimi baisa duwosisia goli.

⁷Baisa avaka alivala biga mokwita wala. Toubuwabu si sasopa ivigaki kwekukologu.

⁸Komwaidona avaka alivala baisa mokwitatoula, e gala avai tuta basasopa kaina bakimiliwoli biga.

⁹Availaga toninitalapula, matauna bigisimlili vavagi komwaidona, e availa tokwateta vavagi bidubadu, matauna bidoki vavagi komwaidona migileu wala.

¹⁰Ibodi bukukwauwaisi ulo vituloki kaimapula siliba. Ibodi bukukwauwaisi nikoli kaimapula goula.

¹¹“Yeigu goli Kabitam. Yeigu akalisuwoli veiguwa kala bwaina. Gala avai vavagi ibodi bukuvitopataisi deli yeigu.

¹²Yeigu goli Kabitam, isim ulo ninitalapula. Anikoli vavagi bidubadu, e tuta tuta aninagi avaka duwosisia.

¹³Kidamwa kutemmalaisi Guyau, e baisa bivigaki mitugaga kwekukolomi wala. Vavagi makwaisina kwekukologu - nona walakaiwa deli kaluvalova, e mitugaga deli biga sopa.

¹⁴Aninamsi avaka bavagi, e oluvi avagi makawala. Isim ulo ninitalapula, e yeigu goli topeula.

¹⁵Gweguya apilasi kidamwa bigiyoubwailasi, e tokwaraiwaga apilasi kidamwa bibubulaisi karaiwaga duwosisia.

¹⁶Komwaidona guyousi mina watanawa ikaraiwogaisi si tomota metoya ogu pilasi, todidabala deli gweguya makawala goli.

¹⁷Ayebwaili availa availa matausina iyebwailigusi. Availaga ininevaigu, bogwa goli gagabila bibanaigu.

¹⁸Aiyosi guguwa deli kamaiaba, e tuvaila aiyosi yubwaila e deli sibwabwaila paila balilasi.

¹⁹Baisa avaka basakaimi ikalisuwoli goula kweminabwaita, e kala bwaina ikalisuwoli siliba migileuwokuva.

²⁰Yeigu aliloula okedala bubunela bwaina, e abokuli makadana kedala karaiwaga duwosisia,

²¹e matausina iyebwailigusi asaiki guguwa, deli si bwala avakasau veiguwa.

²²“Guyau ibubulibogwaigu oluviga vavagi komwaidona, e yeigu goli kwaimatala la bubuli omitibogwa.

²³Okala vitouula vavagi komwaidona ibubulaigu, igau tokinabogwa goli, igau gala bikaloubusi valu watanawa.

²⁴Igau gala isim bolita, yeigu akaloubusibogwa, tutala gala avai sopi bititayelu ambaisa.

²⁵Igau gala ikaloubusisi koya kwevakaveka, tutala gala bisaili koya kwekikekita okabasi, yeigu akaloubusibogwa.

²⁶E tutala Yaubada gala bibubuli valu watanawa deli bigulela, e gala goli bibubuli yelitala pwaipwaia, e ka, yeigu akaloubusibogwa.

²⁷Tutala isaili labuma[6] okabala, yeigu asibogwa, avai tuta isaili valu obusibusi pilatala bila pilayuwela.

²⁸E tutala isaili lowalowa wa labuma, deli iulaim sopila bolita bigibwabula bimwena,

²⁹e iluki sopila milaveta bimwaimwena e gala bikalisau avai kalitutila eisaili, e yeigu goli asibogwa. Yeigu asibogwa wala tutala ikusoi tumilela valu watanawa,[7]

³⁰e yeigu lasisu otalila makawala topilasi, e yam yam yeigu labudoboda nanogu kala mwamwasila, e tuta komwaidona lammwasawa wala omatala.

³¹Lammwasawa paila komwaidona valu watanawa, deli goli iyomwasali nanogu paila komwaidosi mina watanawa.

³²“E tubovau, ka, kunakaigalaigusi. Kuvagaisi avaka lalivali, e bukumwasawasi.

³³Kulagaisi avaka bavitulokaimi, e bukukwabitamsi. Gala sitana bibodi bukupakaisi kami vituloki.

³⁴Availa binakaigalaigu, e matauna bogwa bimwasawa. Matauna yam yam itotu ogu lulu, e itulotula ogu bwala ola kabosusuvi.

³⁵Availa bibanaigu, matauwena bogwa bibani momova, e Guyau bimwamwasila nanola paila matauna.

³⁶Availa gala bibanaigu, matauna iyomiyuyu titoulela. Availa idokaigu tokukolola, matauwena goli iyebwaili kaliga.”