Read Kilivila BIGIVAKALA 9 Bible Online

BIGIVAKALA 9 - Kilivila bible

BIGIVAKALA 9

¹Kabitam bogwa leikaliaii la bwala e kokola kasi bawa kailima kaiyu.

²Minana bogwa eikatumati natana kala bunukwa paila kala paka, e itaguliki kai yekwesila ituwoli ituwoli deli waini, e ikatubiasi kabokamkwam.

³Minana bogwa eiwitali la nawotetila eilosi okubudoga ovalu eidoudousi kawasi,

⁴“Kumaisi, kusuvisi yokomi tolubulobwaga!” E baisa totubunagowa iluki kawala,

⁵“Kumaisi kukomasi kʹagu deli kumomwaisi kagu waini makwelana bogwa lataguliki.

⁶Kusilavaisi mabudona tolubulobwaga, e bukusisuaisi bwaina, E kubokulaisiga kidikedala ninitalapula.”

⁷Ka, kidamwa bukukiduwosisii taitala nanola walakaiwa, mesinaku wala bikagagaim. E kidamwa bukukwamitilaki taitala tomitugaga, mesinaku wala biyomiyuyaim.

⁸E gala avai tuta bukukiduwosisii taitala nanola walakaiwa, paila igau bivigakaim tokukolola wala yoku. Mitaga kidamwa bukukiduwosisii taitala tokabitam, bogwa wala bitemmalaim.

⁹E avai biga bukuluki matauna tokabitam, bogwa bikatumkulovi la kabitam. E avaka bukuluki matauna tomitukwaibwaila, bogwa bikatumkulovi la ninitalapula.

¹⁰Kidamwa bukukwabitam ibodaim wala ikugwa bukukwabikuwoli Guyau. Kidamwaga kunikoli matauna Tobumaboma, e yoku bogwa kuyosi ninitalapula.

¹¹Kabitam bikatumkulovi kam taitu om tuta tomomova.

¹²Kidamwa yoku isim m kwabitam baisa yoku wala kam bwaina, e kidamwaga bukupaiki, yoku wala kam mmayuyu.

¹³Tubunagowa makawala natana vivila minana nabigidadawa, nalubulobwaga deli gala wala isim kala mmosila.

¹⁴Minana bisili wa lulu ola bwala, kaina okubudoga ovalu,

¹⁵e bidoudou baisa tomota matausina bililoulalsi gala togia uwosi kawala,

¹⁶“Kusuvisi kumaisi yokomi tolubulobwaga!” E baisa toninagowa biluki kawala,

¹⁷“Sopi kweuveilau saina simokainigaga. Kaula kweuveilau kala kamkwam saina bwainigaga.”

¹⁸Minana la tauwau gala wala inikolaisi paila tomota ikikaligasi avai tuta eilokaiasi minana ola bwala, e availa availa matausina bogwa eisuvisi, baisa tuta bogwa eisisuaisi wa Tuma.