Read Kilivila SOLOMONI KALA WOSI 5 Bible Online

SOLOMONI KALA WOSI 5 - Kilivila bible

SOLOMONI KALA WOSI 5

¹Ve, lubaigu, yoku kagu vaigwadi yeigu bogwa lala ogu bagula, e akouguguli vana deli mro. E lakamkwam agu kitorina deli kaboiyousala e lamomom agu waini deli agu nunu. Lubemaiasi kukwamsi deli kumomsi tatoula wala bibwaimi kabotutu som lubaim!

²Avai tuta lammasisi, akupakopita wala, e amimi mwada lubaigu leinopipisi wa lulu. Ve lubaigu, yoku nambwailigu deli ulo bubuna kutugwalaigu basuvi. Paila sikukula bogwa leiyopututu dabagu e numla bogwa leikatoguna okulugu.

³Mwa, bogwa lakatulovi agu kwarekwa; avaka dimlela basikamvau miyasina karekwa? Bogwa lawini kaikegu; avaka dimlela bayopigigatu tuvaila?

⁴Mapaila lubaigu ilitaki yoyu, e iyowa lopogu adoki lubaigu bogwa leivakatitaikina.

⁵E asimalaula adoki baulaim yoyu paila matauna bisuvi. E matutona lalitaki woyai paila baulaim yoyu, yamagu bogwa wala lakeputumi mro, e misikwaikwegu ivakasau bulamila mro.

⁶E aulaim yoyu paila lubaigu bisuvi, mitaga lamokaia bogwa leila. Saina magigu balagi sitana kaigala! Mapaila anevi matauna, mitaga gala gagabila babani. Adoukoli matauna, mitaga gala wala sitana anakaigali mapula.

⁷E matausina toyausa eiyuuyausasi valu igisaigusi, e iwaigusi deli ikatubuyavaigusi. E matausina eiyuuyausasi okalila valu, ikisaisi miyana kagu seikeula.

⁸Veve, yokomi vilemi Yerusalem, kukwatotilasi baisa yeigu, kidamwa bukugisaisi lubaigu, bukulukwaisi matauna kawami, “Lubaim namwaidona wala nakaliga baisa yoku.”

⁹Ve, yoku saina wala kutubosaki, vivila komwaidosi kasi kaimatala wala yoku. Ki, avaka kala tuwoli metoya baisa lubaim deli tauwau komwaidosi ke? Ki, kudoki wala itubosaki e bukulukwaimasiga mwada bakakatotilasi baisa yoku.

¹⁰Lubaigu tomatabwaila deli topeula, Matauna migila ikalisuwoli lakatuluwovila tauwau migisi.

¹¹Migila kwedudubuna deli subusobu, kulula yasisiai deli yabubwabwau makawala digulesi bulibuli bwabwaula.

¹²E matala kwegigigia makawala bubuna mitasi minasina eitotusi opapala waya, kala migileu tadoki wala tavakakai wa nunu, deli itotusi opapala waya.

¹³Matauna kimwala kala bwaina makawala kwaitala bagula, ivakasau lokwai deli vana ituwoli ituwoli. Bilubalola makawala bwaimwara, giula makawala mro bulamila.

¹⁴Yamala saina kweyamanabwaita e kala kakalougwa lesisikoma isim katububulela, wowola kala dudubuna makawala doga dudubunela, makaina ikatububulaisi deli dakuna yagala sapaya.

¹⁵Kwaipiapala kala gigisa makawala kokola leiyoudulaisi metoya dakuna alabasita, makaisina si kabototu goula wala. Matauna itubosaki, makawala Koyala Lebanoni kaila makaisina kweisila itubosakisi.

¹⁶Bitavayaula owodola saina sumokainia, e kala kaibisibasi komwaidona ikikau wala nanogu. Ka, yokomi vilemi Yerusalem, baisa makawala lubaigu kala gigisa.