Read Kilivila SOLOMONI KALA WOSI 6 Bible Online

SOLOMONI KALA WOSI 6 - Kilivila bible

SOLOMONI KALA WOSI 6

¹Ve, yoku saina wala kutubosaki, vivila komwaidosi kasi kaimatala yoku, lubaim ambaisa leila? Kulukwaimasi lubaim ammakadana la keda leim, e gagabila bakapilasaimsi bitanevaisi matauna.

²Lubaigu bogwa leila ola bagula makwaina bigulela paninita, matauna eiuvakam la yawa obuyagu, ikikipoi kala bwaimwara.

³Yeigu lubaigu matauna, e matauna lubaila yeigu, eiuvakam la yawa olukuvasi bwaimwara.

⁴Lubaigu, yoku saina namatabwaila makawala valu Yerusalem saina viloumatabwaila, kaina makawala valu Tesa saina viloumatabwaila. Yoku kam gigisa itututu wala wowogu makawala mavilousina valu vilouvakaveka.

⁵Ve, kuligaiwa gisamapu, paila saina iguguti wowogu. Kulum leiuwaimimila makawala yuwotala gota leidadailisi metoya wa koyala Giliadi.

⁶Kudum pupwakaula makawala sipi minana makateki wala leivakakayaisi, gala kaitala kudum isasa, komwaidona wala saina kasakutukutu.

⁷E bwaikwanelaga kimwam lokukwapoli.

⁸Ibodi guyau bivilayawa naluwolima naluwotala giyouvila, e naluwolima naluwotolu la ula bivigaki makawala la kukova, e tuvaila goli kapugopugula gala bitakalau!

⁹Mitaga yeigu ayebwaili natinidesi wala, minana kala namanabwaita makawala natana bubuna. Minana inala leiuni kalamwaleta wala vivila, e inala saina iyebwaili minana, e ivigaki minana latula nambwailila goli. Komwaidosi vivila avai tuta bigisaisi minana saina ikavisaisi, e giyouvila deli minasina ula eivigaki makawala la kukova iusiwosisi iyakawolaisi minana.

¹⁰Avaivila minana la mitakavati leiyuwoula makawala visiga? Minana namanabwaita deli eilululu kanivala, makawala kalasia kainaga tubukona visigala.

¹¹Yeigu lama latotu ouula makaisina saida mwada bavakawoli kai itumtamsi ogu bagula oitayatila, e bagisi sobulesi ulo waini leiulisalalasi deli goli bavakawoli lalela makaisina gigiku leisisisisi.

¹²Ve, yeigu bogwa latatatuva, paila lokukwammalaigu bitasivaduli makawala taitala kumatoula itulotula bibasi okawakali.

¹³Ve, yoku vilakapugula vilem Sulam, kuma kukwaiwosi, e bakagigisaimsi. Avaka uula magimi bukugigisaigusi avai tuta akakaiwosi oluwalaisi togigisa, ke?