Read Kilivila SOLOMONI KALA WOSI 7 Bible Online

SOLOMONI KALA WOSI 7 - Kilivila bible

SOLOMONI KALA WOSI 7

¹Ve, saina namanabwaita yoku! Bwaikwanelaga lokuvakouya kapolela kwaibakwaim. Kwaipiapam dodogala tadoki wala si katuduvidavi toyoudulesi tokolu.

²Ka, kwelatala bolu mekikanaikila baisa, e makwelana sopila gala avai tuta bimada. Gulotala taitu makawala geu metitokila baisa, e bwaimwara itavini itapatu.

³Nunum nupiakwa, kala gigisa makawala nupoyu dia, kaina makawala nayu nagugugwadi dia.

⁴Kaiyom kala gigisa saina bwaina makawala kwaitala bolela vatoi leikatububulaisi metoya doga. E matam kala gigisa makawala sopila vilouveka Esiboni makwaisina opapala kalapisilela mavilouna vilouveka. Kabulum saina keminabwaita, tadoki wala mina Lebanoni si bwala vatoi makwaina leikounakaila valu Damasiko.

⁵Dabam leikuva makawala Koya Kamela. E kulum lokuvili leivivivila makawala miyasina karekwa yammanum deli yakavikavila, e kala gigisa wala ibodi bikau nanola guyau.

⁶Ve, bwaikwanelaga kam gigisa, saina namatabwaila yoku, m kwatugweimila ketigamla wala lopogu.

⁷Kam kwebisibasi makawala kaitala pulopola, e nunum makawala goli mabikosina kaiuwala.

⁸Yeigu bamweni makaina pulopola e bakiuya kaiuwala. Nunum kala lumkola makawala bukulela waini, e m yagisa kubowala makawala mokolu maiinela,

⁹e wodom kakamwenala makawala dilimoya waini. Ibodi wala waini makwaina bitayelu bisaitaula bilokaia lubaigu, bitayelu bila obilubalola deli okudula.

¹⁰Namwaidogu wala lubaigu la vavagi, e matauna saina nambwailila yeigu.

¹¹Mwa lubaigu, kuma bitam wa lolia, e bitakanawa wala obuliyamata.

¹²E kaukwautoula wala bitamamata e bitavakawoli matamsina da sobula kaina bogwa leiulisalalasi deli makaisina gigiku lalela bogwa leisisisi. E makatupona wala bayomitali ulo yebwaili.

¹³Ka bogwa lokusikoni maiinela koiwaga, deli komwaidona makwaisina kawailuwa kwemmatabwaila oda kaukweda. Mwa lubaigu, ka, da katudabuma makwaisina kwaibubogwa deli kwaiwovau lasisii wala.