Read Kilivila AISEA 26 Bible Online

AISEA 26 - Kilivila bible

AISEA 26

¹Kwaitala yam igau bima tomota biwosaisi mapilana wosi oviluwela Yuda, kawasi, Da valusi saina kwaipeula! Yaubada titoulela bikoli mavilouna kalila.

²Taulaimwaisi valu kalapisilesi e tatugwalaisi boda mabudona mina dubumi bisuvisi, mabudona goli iuvagaisi avaka kamokwita.

³Yoku Guyau kusaiki vakota mokwita baisa availa matausina ininatotilasi deli si dubumi isailisi baisa yoku.

⁴Bitadubumaisi Guyau tuta komwaidona, matauna tuta komwaidona bikolaidasi.

⁵Matauna bogwa ivabu watanawa matausina mina kamnomwana; e ikatudidaimi si valu kwaipeula makwaina leisisikaisi, deli ivakubali kalisi ila opwaipwaia ikatumsumsoli.

⁶E availa availa omitibogwa matausina eilamidadaisi baisa tuta eililoulasi odabala makwaina e okaikesi ivapupoiyaisi.

⁷Mwa Guyau yoku lokukwatudubuni si keda mina mitukwaibwaila; e biloulasi keda duwosisia.

⁸Yakamaisi bakabokulaisi nanom e ma pikwakusi bogwa lakavatobusi baisa yoku; yoku wala kammwaleta ma nakusisi.

⁹Wa bogi kam nananamsa iyokupataigu; avai tuta bukuyakali valu watanawa deli tomotela, matausina komwaidosi bikatetasi avaka karaiwaga duwosisia.

¹⁰Ilagoli yoku bukumitukwaii mina mitugaga, mitaga matausina gala avai tuta bikatetasi avai vavagi bwaina. Ilagoli matausina isisuaisi olumoulela si valu mina mitukwaibwaila mitaga immitugagasi wala; matausina ipakaisi paila bivitokaisi tolosila m giyouveka.

¹¹Kam tilaula gala inikolaisi bukumipuki matausina. Mwa Guyau, kuyomsili matausina e kutagwala bilumkolaisi mmayuyu; kutagwala bilumkolaisi kala mmayuyu mmipuki makwaina bogwa lokukwatubiasibogwi. Kuvituloki matausina ammakawala kala vakaila m yebwaili baisa m tomota.

¹²Guyau, yoku bukuvigakaimasi bakasibwabwailasi; vavagi komwaidona lakabubanaisi baisa uwala avaka m wotetila.

¹³Guyau yoku ma Yaubadasi. Ituwoli tomota baisa tuta eikikaraiwogaimasi, mitaga ma Guyausi kammwaleta wala yoku.

¹⁴Baisa tuta matausina bogwa leikaligasi e gala tuvaila bimovavausi; bilomasi gala tuvaila bitokaiavausi, paila bogwa lokumipuki matausina deli lokukwatudoum matausina. E gala wala availa tuvaila iluluwai matausina.

¹⁵Guyau, bogwa lokuvigaki ma bodasi eikwaiveka, e ma kabokaraiwagasi eibeiyaya eimwaim eimwaim, metoya baisa kuyomitali kam taimamila.

¹⁶Guyau yoku kumipuki m tomota, e deli kasi mmayuyu inigadasi baisa yoku.

¹⁷Guyau, yoku kuvigakaimasi kawaiweyasi, makawala natana vivila biwaiweya avai tuta bigadi paila bivalulu.

¹⁸Yakamaisi toyo kama mmayuyusi deli kala kaikai ninamaisi, mitaga gala wala avaka uwala ikaloubusi. E paila ma pwaipwaiasi kabiliala gala wala avai tuta katomgagasi; e gala wala avai vavagi kabanaisi.

¹⁹Komwaidosi ma tomotasi matausina bogwa leikaligasi igau bimovavausi! Matausina tomwaidosi wala bitokaiasi bimovavausi. Komwaidosi matausina eimasisisi okasi laka bimamatasi e biwosisi deli si mwasawa. Makawala numla eiyomovi valu watanawa e makawala goli Guyau biyomovivau matausina bogwa leikaligabogwasi.

²⁰Yokomi ulo tomota, kusuvisi omi bwala e kukwatubodaisi kami yoyu. Bukusupepunisi olumoulela tuta pikekita wala, tatoula wala Yaubada la gibuluwa biwokuva.

²¹Ka, Guyau bibusi bima metoya ola kabosisu wa labuma paila bimipuki mina watanawa paila si mitugaga. E katumata makwaisina leikiwolaisi ovalu watanawa bogwa biyoumatilasi, e pwaipwaia gala ibodi bikatupwani matausina availa availa leikatumataisi.