Read Kilivila AISEA 35 Bible Online

AISEA 35 - Kilivila bible

AISEA 35

¹E ka, viloupakala bogwa goli bivigaki kabomwamwasila, deli lala bogwa bilalasi ovilouwokuva.

²E oviloupakala tomota biwosisi deli bidousi paila mwasawa. E kala gigisa bivigaki saina bwainigaga makawala goli koyala Lebanoni, deli bivigaki bikubilumalala makawala goli makubilasina kubilesi Kamela deli Saroni.[30] E tomota komwaidona bogwa bigisaisi Guyau la guyugwayu, e bigisaisi la giyouveka deli la peuligaga.

³E tauwau, kupapeulasʹo! Kaina goli yumami bogwa eimamasi, mitaga kukwatuwayaiyaisi wala. deli kaina goli kaikemi bogwa eimamasi e eikikatupupeilimi, mitaga kuvautuutusi wala.

⁴Kulukwaisi matausina ininayuwasi, kawami, “Ka, Yaubada bogwa bima paila bikolaidasi, matauna bima bimipuki kada tilaulasi. Mapaila kupeulasi wala e taga bukukokolasi.”

⁵E mina kau bogwa goli bimitalalasi, deli mina tuli bogwa goli bilegasi.

⁶E mina pem bogwa goli bilouleusasi deli kaiwosisi, deli matausina tokutabu bogwa goli biwosisi deli si mwasawa. E sopi bititayelu goli oluwalela viloupakala,

⁷e makatupona mwada kanakenuvawokuva wala bogwa goli bimila katuwotu, e obidapakala bikasewoki goli sopi bititayelu. E ambaisa omitibogwa ugiwagi si kabosisu, bogwa goli bisusinasi lei deli kivikivi.

⁸E kadatala kadaula bisuwa goli mapilana, e kadaula makadana yagala bidokaisi “Keda Kadubumaboma.” E gala avai tuta taitala tomitugaga bikwaidadina metoya keda makadana, e matauna tonagowa gala gagabila bivakapusii matausina ililoulasi keda makadana.

⁹E laiyoni gala bisisuaisi baisa, kaina avai mauna nagigasisi bisuki keda makadana. Mitaga availa availa matausina Guyau bogwa eikoli ibodi goli bisuwaisi keda makadana bilosi osi valu.

¹⁰E matausina goli biviloubusisi Yerusalem deli si mwasawa, biusiwosisi deli bidoudousi deli kala mwamwasila ninasi. E si mwasawa bikanuvagasi goli, e gala tuvaila bininamwausi deli bivalamsi.