Read Kilivila AISEA 38 Bible Online

AISEA 38 - Kilivila bible

AISEA 38

¹Tuta matutona guyau Esekaia ikatoula, katitaikina bikaliga. E Aisea tovitoubobuta matauna Amosi latula ilokaia igisi matauna e iluki matauna kawala, “Guyau eilivala bukukibuboti komwaidona vavagi bibwaina paila uula gala bukubwaina. Yoku bogwa bukukwaliga.”

²Mapaila Esekaia isivilaki taboda e inigada, kawala,

³“Guyau, kululuwai, yeigu atagwala awotitalaim deli nanogu komwaidona, e tuta komwaidona avigikoni auvagi avaka nanom magim bavagi.” E matauna ikawoti koku ivalam ivilumgaga.

⁴E oluvi Guyau ikaraiwogi Aisea

⁵bikaimilavau bilokaia Esekaia e biluki matauna kawala, “Yeigu Guyau, tabum Debida la Yaubada, bogwa lalagi m nigada deli lagisi mitilagim. Yeigu batugwalaim bukusisu kala kaduwonaku kwailuwotala kwailima taitu tuvaila.

⁶Yeigu bakolaim deli goli bakoli Yerusalem metoya oyamala guyoula Asiria, e tuta komwaidona bayamati valu mavilouna.”

⁷Aisea ivitakauloki kawala, “Guyau Yaubada bisakaim kwaitala kabotuvatusi makwaina bikamokwiti matauna ibodi bivagi makawala la biga katotila.

⁸E daga makaina guyau Eyasi leiyouduli Guyau Yaubada bivigaki kaikobuwokuva wala bivayumali kweyaluwotala bakwai.” E kaikobu ivayumila kweyaluwotala bakwai.

⁹Avai tuta Esekaia eibwaina metoya okala katoula, ibutu mapilana wosila yakaula.

¹⁰Adoki yeigu ogu tuta wowogu kala peula mitaga makateki balokaia Tuma e gala goli basivagasi batomoya.

¹¹Adoki baisa osi valu mina momova gala tuvaila bagisi Guyau, kaina goli avai tomota tomomova.

¹²Ulo momova iutupwi e bogwa itamwau, makawala buliyoyova bitakatupwi, kaina makawala towola karekwa isaim wa wola. Adoki Yaubada eiuvigimkulovi ulo momova.

¹³Bogi komwaidona aukuwakula deli mmayuyugu. Agu lumkola makawala laiyoni ikatumkumku totuwanegu. Adoki Yaubada eiuvigimkulovi ulo momova.

¹⁴Kaigagu isasali saina mama e akayagigila makawala minana bubuna. Matagu inunupula metoya saina akounakaila gawata. Mwa Guyau kukolaigu metoya komwaidona uvagila mwau.

¹⁵Wa, avaka ibodi balivala? Guyau bogwa leivagi baisa. Saina ikiuta nanogu! Gala gagabila bamasisi.

¹⁶Mwa Guyau, ka, bamova paila yoku, mayoku wala. Kukolaigu. Bukutagwala bamova wala.

¹⁷Nanogu saina ikiuta baninavila bavakota wala. Yoku kukwatumovaigu metoya kabosilagi komwaidona. Yoku kuligaiwa komwaidona ulo mitugaga.

¹⁸Gala gagabila tomata biyakawolaimsi metoya mapilana Tuma. Tomata gala bibodi bidubumaimsi yoku saina tokimadagi.

¹⁹Mina mmomova wala iyakawolaimsi makawala tuta baisa goli aiyakawolaim. Tomota bilukwaisi litusia paila yoku tokimadagi wala.

²⁰Mwa Guyau, bogwa lokuyomovaigu. Ka, bakawaisi gita bakawosisi kam yakaula, e oma tutasi tommomova goli bakausiwosisi kam yakaula olumoulela m Bwala Kwebumaboma.[32]

²¹Aisea iluki guyau Esekaia bikau kaituva leivagaisi metoya noku kaiuwala e bikuma kala pukuna, e matauna bibwaina.

²²Oluvi guyau Esekaia ikatupoi kawala, “Ki, avai kabotuvatusi bikamokwiti kidamwa bibodaigu yeigu bala wa Bwala Kwebumaboma ke?”[33]