Read Kilivila AISEA 40 Bible Online

AISEA 40 - Kilivila bible

AISEA 40

¹E Guyau da Yaubadasi eilukwaigu kawala, “Kukwatigam luposi ulo tomota. Kukwatigam luposi matausina!

²Kukwatupewoli mina Yerusalem. Ka, kuluki matausina mwada yeigu lamipuki matausina paila si mitugaga komwaidona mapula, mapaila kasi mmayuyu[34] bogwa goli biwokuva deli si mitugaga bogwa laligaiwa.”

³Taitala idoudou kawala, “Kukwatubiasaisi ovilouwokuva la keda Guyau! Kukwatumigileuwaisi la keda da Yaubadasi oviloupakala!

⁴Kukwalidubolaisi komwaidona itayatila, e kukelaisi komwaidona koya kwevakaveka bibusisi. E dubakaila bimila kabatau, e kabigaga omi valu kukwatudubunaisi.

⁵E matutona goli Guyau biyomitali la guyugwayu, e komwaidona mina watanawa bogwa bigisaisi. Ka, baisa Guyau titoulela bogwa eikatotila makawala.”

⁶E taitala idoudou kawala, “Kukwamituli mabigasina!” E yeigu akatupoi kawagu, “Avai biga bakamituli?” E kawalaga, “Kukwamituli kawam, mina watanawa komwaidona makawala mnumonu, e matausina si momova kala kaduwonaku makawala goli lala.

⁷Avai tuta Guyau biwitali yagila biuu, mnumonu biyagisi e lalesi bikalidubali. E tomota si tuta kala kaduwonaku makawala goli mnumonu.

⁸E mokwita goli mnumonu iyagi e lalela ikalidubali, mitaga da Yaubadasi la biga bikanuvagasi goli.”

⁹Eei, guma Yerusalem, kumwena kula odabala koya kwaiveka, e kukwamituli bulogala bwaina! Guma Saiyoni, kudou okaigam kaigaveka, e kukwamituli bulogala bwaina! Mwa! Kukwatuvagwagu wala e gala bukukokola. Kuluki tomota eisisuaisi oviluwela Yuda si Yaubada bogwa goli leimaima!

¹⁰E ka, Guyau Yaubada bima biguyau deli peuligaga, e bima bimai la mapu[35] paila la tomota.

¹¹Matauna biyamati la yawa makawala goli taitala toyamata sipi. Matauna bikouguguli lam komwaidona e bikopwi minasina. E matauna bivamanum wala bivakadi inisia lam.

¹²Ki, ibodi availa bitali sopi oyamala e bikalau kala bawa sopi obolita? Kaina biuwi labuma oyamala? Ki, availa ibodi bivakasau komwaidona pwaipwaiala valu watanawa metoya kwelatala viga? Kaina bivisaikoli koya deli dubakaila kasi mwau metoya okabovisaikola?

¹³Ki, availa ibodi biluki Guyau avaka bivagi? Availa ibodi bivituloki kaina bitayuvisi avaka baisa matauna?

¹⁴Ki, avai tomota ibodi bivituloki Yaubada mwada binikoli deli bikateta, deli goli bitapuloki nanola e bivagi vavagi kwaitala kwaitala?

¹⁵Mitaga Guyau bidoki boda kwaitala kwaitala gala wala avaka, e mabudosina makala wala litukwa, e simla makwaisina kaduwonaku kasi gagabila makala wala tubumyou.

¹⁶E komwaidona mauna oudilela Lebanoni gala wala ibawasi paila bitalulasi baisa da Yaubadasi, deli kaila gala kala bawa paila bitavigakaisi kovala lula makwaina.

¹⁷Mapaila boda kwaitala kwaitala idoki gala wala avaka dimlesi.

¹⁸Ki, availa ibodi bitavisaiki makawala Yaubada? Kaina ammakawala bitakamitububuli kala gigisa matauna?

¹⁹Ka! Matauna gala makawala tokolu. Paila toyoudila eiyoudulaisi tokolu, deli tanumnumta topaisewala isailisi goula paila kala katububula e ivitauwaisi okabosakaila makwaina silibawokuva wala.

²⁰Avai tau matauna gala gagabila bibani siliba kaina goula binagi bubotala kai mabubona gala gagabila bipwasa. Matauna binevi taitala tokataraki totavi tokolu, e biyouduli natana tokolu gala igagabila bikapusi.

²¹Ki, gala kunikolaisi? Kaina gala availa ilukwaimi omitibogwa? Kaina gala kulilagaisi ammakawala valu watanawa eivitouula?

²²Ka! Valu watanawa kala tobubula, matauna wala tuta komwaidona bisisu ola takaikaia, odabala valu watanawa deli odabala labuma. E tomota osikowala kasi vakaila makala wala lata kasi vakaila. Matauna ikatuvakai labuma makawala yatala laya, e ivigaki makawala buliyoyova paila si kabosisu tomota.

²³Matauna ivabu tokwaraiwaga saina mina papeula metoya osi kabokwaraiwaga, e ivigaki matausina gala wala avaka.

²⁴Matausina makala wala sobula, makateki wala eisusinasi e gala wala kailawalisi. Ka, avai tuta Guyau biwitali yagila bima, bivisi matamsina bimatutilasi e biyuvisau bilau makawala wawa wala.

²⁵Ki, availa ibodi bitavisaiki makawala Yaubada Tobumaboma? Ki, availa taitala tuvaila makawala matauna?

²⁶Ka, kukowanasi wa labuma! Availa eibubuli utuyam minasina lokugigisaisi? Ka, matauna ivisunupulovi minasina makawala budotala tokwabilia, matauna goli inikoli avaka kasi bawa. E gala wala avai tuta natana minasina bitamwau, paila matauna ididou yagasi natana natana minasina. Matauna la peula saina vakaigaga!

²⁷Mitaga mina Isireli, avaka paila baisa tuta kutakulukulusi mwada Guyau gala wala ininikoli kami mwau kaina gala itovilakaimi avai tuta bukubodasi mmayuyu metoya karaiwaga doudoga?

²⁸Ki, gala kunikolaisi? Kaina gala kulilagaisi? Ka, Guyau Yaubada matauna tosivagasi. Matauna goli eibubuli komwaidona valu watanawa. Matauna gala wala avai tuta isisomata kaina ikikamagwesi. Deli gala wala availa ikikateta la nanamsa.

²⁹Matauna ikatupewoli availa matausina mina mamama deli kasi somata.

³⁰Ilagoli matausina tubovau bogwa wala bimamasi, deli matausina tubovau bogwa bikapusisi deli kasi somata.

³¹Mitaga availa matausina idubumaisi Guyau paila pilasi, matausina bogwa bibanaisi si peula bivigivau. Matausina biyowasi makawala mluveka. Matausina bisakaulasi mitaga gala bisomatasi, e bililoulasi mitaga gala wala bimamasi.