Read Kilivila AISEA 44 Bible Online

AISEA 44 - Kilivila bible

AISEA 44

¹E Guyau ilivala kawala, “Yokomi mina Isireli ulo towotetila tubula Yekobe, yokomi ulo tomota bogwa lanagaimi, kunakaigalaigusi!

²Ka, yeigula Guyau labubulaimi. Tuta makwaina yokomi lokukwaloubusisi e leima lagaila, yeigu lapilasaimi. E yokomi ulo towotetila, e ulo tomota bogwa lanagaimi e ayebwailimi. Mapaila gala bukukokolasi.

³“Yeigu bogwa bavinumli mi pwaipwaia, deli bavagi sopi bititayelusi obidapakala. Yeigu bogwa baligabu ulo peula baisa litumia, deli bamitukwaii tubumia.

⁴E matausina bikaitubwasi makawala mnumonu ivinumlaisi tuta tuta, deli makawala guvagava eisususinasi opapala sopi eititayelu.

⁵“E tomota taitala taitala titoulela bilivala kawala, ‘Yeigu Guyau la tomota.’ E matausina bimaisi e bisuvisi osi boda mina Isireli. Taitala taitala matausina biwai kala katukwatuva oyamala kabutuvitusila Guyau yagala, e bikayupali titoulela mwada matauna taitala Yaubada la tomota.”

⁶E Guyau, matauna mina Isireli kasi tokwaraiwaga deli kasi tokwala, matauna goli Guyau Topeuligaga, kala livala baisa makawala. “Ka, yeigu wala kala vitouula, e kala vigimkovila, deli agumwaleta wala Yaubada yeigu. Ka, agumwaleta wala Yaubada, e gala avai yaubada tuvaila isisu ambaisa.

⁷Ki, availa tuvaila ibodi bivagi makawala avaka yeigu bogwa lavagi? E availa ibodi bivitububoti komwaidona vavagi makwaisina eikikaloubusisi okala vitouula mokwita e bila okala vigimkovila tuta ke?

⁸E ulo tomota, gala bukukokolasi! Yokomi bogwa lokunikolaisi mwada tuta omitibogwa e leima tuta baisa yeigu wala lavitububoti komwaidona vavagi makwaisina bikaloubusisi, e yokomi goli ulo tosola. Tauwau, avai yaubada tuvaila isisu, ke? Kaina kwatulaisi avai yaubada isim la peula minana? Yeigu gala avai tuta alilagi bulogala.”

⁹Komwaidosi matausina ibububulasi tokolu gala wala dimlesi, e deli minasina yaubada eibubulaisi e eidokaisi saina bwainigaga gala wala dimlesi. E matausina ititaimamilasi baisa minasina yaubada badoki mina kau deli mina ninagowa - e deli matausina igau bimmosilasi.

¹⁰Gala wala avaka kala bwaina mwada bitabubuli avai migina metoya otanumnumta e bitatemmali mwada minana yaubada.

¹¹Ka, availa availa matausina ititaimamilasi baisa minana tokolu bogwa bimmosilasi. E matausina eibububulasi tokolu, matausina tomotatoula wala. Ibodi matausina bimaisi okaboyakala - matausina bogwa bibulukukoli deli biuliki mmosila.

¹²Ka, matauna tanumnumta topaisewala bikau pilatala tanumnumta e bigabu wa kova oluvi bipaisewa. E biyosi kaitutu oyamala kweyapeula e bitutu mapilana tanumnumta bimila migina. E ola tuta paisewa matauna ilumkoli molu, daka deli somata.

¹³E matauna tokaliai ivisaikoli bubotala kai, e oluvi bileiya kala gigisa tomota wa kai metoya opwanosi. Matauna bikau la kaiyoudila e biteya kai mabubona e bibubuli makawala tomota. E kala gigisa saina namanabwaita makawala tomotatoula wala paila bisaili ola bwala.

¹⁴Matauna kaina biteya bilukubali kaitala kweisila paila biyoudila, kaina binagi yawa kainaga reiyava metoya olawodila. Kaina goli bivali kaitala bulaku e bitulotula wala paila kuna bikuni e bikaiveka.

¹⁵Ka, metoya kaitala kai, tau matauna bivigaki kabulotala la kai paila kova e kabulotala paila biyoudila tokolu. Metoya kabulotala tau matauna biviya e bivigadi la kova paila bikaikwala deli bigabu kʹala, e kabuloyuwelaga bibubuli natana la yaubada paila bititaimamila baisa minana.

¹⁶Metoya bubovila kai makaina leiviya, matauna bivigadi kovatala kova; e bigabu kala viliona bikam e bogwa bikomata. Matauna bikikaikwala e bilivala kawala, “Oowʹei, ina bwaina yuviyavila ulo kova!”

¹⁷E mmwaisalaga kai makaina iyouduli natana tokolu, e ikululu e itemmali minana. E matauna bininigada baisa minana, e bililivala kawala, “Yoku ulo yaubada - kukwatumovaigu!”

¹⁸Ka, tomota makawala matausina saina toninagowa, e gala gagabila binikolaisi avaka baisa eiuvagaisi. Matausina bogwa wala eikibodaisi mitasi deli ninasi e gala gagabila bigisaisi kaina binikolaisi avaka kala kamokwita.

¹⁹Ka, matausina eibubulasi tokolu ibodi bilivalasi makawala kawasi, “Bubovila kai bogwa lavigadi kova e lagabu kʹagu deli agu viliona opwakovela e lakoma. E mmwaisala kai layouduli natana tokolu. E ka, tuta baisa lama latitaimamila omatala mabubona kai!” Mitaga matausina gala sitana si kabitam kaina bitapuloki ninasi paila bilivalasi makawala baisa.

²⁰E ka, kidamwa la ninitalapula bogwa makawala, matauna ibodi bikamkoma tubwaga kidamwa bikatumati kala molu. E la nanamsa makwaisina kweninagowa bogwa eivisilagi matauna e galaga avai pilasi bibudoki. Matauna gala gagabila bininavila e biluki titoulela mwada tokolu minana leiyosi oyamala gala natana yaubada minana - gala wala.

²¹E Guyau ikaibiga kawala, “Mina Isireli, kululuwaisi baisa. Kululuwaisi yokomi goli ulo towotetila. Yeigu labubulaimi e yokomi goli ulo towotetila, e yeigu gala wala avai tuta balumwelavaimi.

²²Yeigu bogwa lakau komwaidona mi mitugaga e laligaim makawala yagila biyuvisau lowalowa bilau. Kukwaimilavausi kumakaiagusi. Ka, yeigu wala kami tokatumova.”

²³Bubuli wa labuma, kudousi deli mi mwasawa! Valu watanawa kudousi kaigami walakaiwa! Koya deli kai kaitala kaitala olawodila kudousi deli mi mwasawa! Paila Guyau bogwa eikimitali la tomgwaga paila eikatumovi la tomota mina Isireli.

²⁴“Ka, yeigu wala Guyau, yeigu wala kami tokatumova. Yeigu wala labubulaimi. E yeigu wala Guyau, e yeigu wala bubuli komwaidona kasi tobubuli. Yeigu agumwaleta wala lakatuvakavi labuma. E avai tuta yeigu labubuli valu watanawa, gala wala availa ipilasaigu.

²⁵Yeigu ayosokani wala matausina tokalamimi, deli abuloti si vitoubobuta totulusi kweluva. E avaka tokabitam bilivalaisi yeigu akaluwou wala, e avituloki si kabitam nagowa wala.

²⁶Mitaga avai tuta yeigu bawitali taitala ulo biga kala tokeula paila bikimitali avaka ulo nanamsa, e avai tuta ulo touwata bivitububoti avaka, yeigu bavagi nanamsa makwaisina deli vitoubobuta makwaisina bikaloubusisi makawala. Yeigu aluki Yerusalem kawagu tomota igau bisikailimsi tuvaila, e aluki makwaisina viluwela Yuda bogwa goli bivigivauwaimi. Makwaisina valu bogwa eidadaimisi mitaga yeigu bavigivau.

²⁷E yeigu ogu biga wala akaraiwogi tilibwabwau imada.

²⁸Yeigu aluki Sairusa[45] kawagu, ‘Mwa! Yoku bogwa lanagaim, mwada bukuguyoi ulo tomota. Yokugwa bukuvagi avaka nanogu bukuvagi. Yoku bukukwaraiwaga paila Yerusalem kala vigavau deli Bwala Kwebumaboma tumilela kala katubaiasa.’”