Read Kilivila AISEA 46 Bible Online

AISEA 46 - Kilivila bible

AISEA 46

¹“E ka, minasina mina Babiloni si yaubada si tuta kala vigimkovila! Minasina Beli deli Nebo omitibogwa itemmalaisi. Mitaga baisa tuta minasina bogwa eisailisi otupwasi ase, ivigakaisi koni mwau wala minasina mauna.

²Minasina tokolu gala wala gagabila bikolaisi titoulesi. Mitaga bogwa eiyosisi eikauwaisi eilauwaisi. E baisa kala vigimkovila mina Babiloni si yaubada!

³“Mitaga kunakaigalaigusi yokomi tubula Yekobe, komwaidomi yokomi kesala ulo tomota. Ka, omi tuta eivilulaimi yeigu avitouula ayamataimi e leima baisa tuta.

⁴Yeigu goli mi Yaubada, e yeigu bayamataimi tatoula wala bukutomoyasi deli bukuvinumoyasi deli bukukwasousousi. Yeigu labubulaimi e yeigu bayamataimi. Yeigu bapilasaimi deli bakolaimi.”

⁵E Guyau ikaibiga kawala, “Ki, availa makawala yeigu? Ki, availa kudokaisi taitala tuvaila makawala yeigu?

⁶Tomota iulaimwaisi kasi kauya e ilupisauwaisi goula. Matausina ivisaikolaisi siliba mokaila okabovisaikola. E ikabutaisi taitala goula kala toyoudila e ibubuli natana si yaubada, e oluvi matausina ikululusi e itemmalaisi minana tokolu!

⁷Matausina ikatikeuwaisi minana, e ilauwaisi. Ivitauwaisi minana ola kabototu, e minana itovagasi wala gala gagabila biloula. E kidamwa availa binigada baisa minana, minana gala wala bivitakauloki matauna, kaina bikatumovi matauna metoya avai mwau.

⁸“Mitaga ka, kululuwaisi baisa, yokomi mina mitugaga, biyelu ninami avaka yeigu bogwa lavagi.

⁹E kululuwaisi avaka bogwa eikaloubusisi omitibogwa. Bukusimokwitasi yeigu wala agumwaleta Yaubada, e gala wala availa taitala tuvaila makawala yeigu.

¹⁰Igau okabovitouula yeigu avitububoti avaka bikaloubusisi. Omitibogwa yeigu alivalabogwa wala avaka bikaloubusisi. Yeigu akaibiga kawagu, avaka nanogu bavagi gala wala bamama, paila yeigu ibodaigu wala bavagi komwaidona vavagi avaka ibudoki nanogu bavagi.

¹¹Yeigu ladidou taitala tau bima metoya opilibomatu.[49] Matauna bitalakapusi bima makawala natana mluveka, matauna bivigimkulovi avaka yeigu bogwa laninamsibogwi. Ka, yeigu bogwa lalivala, e bikaloubusi goli makawala.

¹²“Ka, kunakaigalaigusi, yokomi kasai ninami, yokomi mi nanamsa mwada tomgwaga la tuta saina kaduwonaku.

¹³Ka, yeigu lauvigaki yamla tomgwaga bogwa eiuvakatitaikina - e gala wala kudokaisi mwada kaduwonaku. Yeigu ulo katumova gala wala biyobali. Yeigu bogwa bakoli Yerusalem e baisa bivigaki mina Isireli kasi taimamila.”