Read Kilivila AISEA 48 Bible Online

AISEA 48 - Kilivila bible

AISEA 48

¹Ka mina Isireli, kulagaisi baisa, yokomi komwaidomi lokutoyasi metoya Yuda odalela. Yokomi kubigasi katotila mwau metoya oyagala Guyau mwada kutemmalaisi Isireli la Yaubada - mitaga kami udowokuva wala kulilivalaisi.

²E yokomi kukwayupalaisi mwada tolivalu mavilouna viloubumaboma deli yokomi kukwanuvatetasi baisa Isireli la Yaubada, matauna yagala Guyau Topeuligaga.

³E Guyau iluki mina Isireli kawala, “Omitibogwa yeigu bogwa lavitoubogwi wala avaka igau bikaloubusi, e saina nanakwa lavigaki leikaloubusi makawala.

⁴Yeigu anikolibogwi wala yokomi kasai dubami, kala kasai makawala tanumnumta aiyani e kala peula makawala tanumnumta barasi.

⁵Mapaila yeigu avitoubogwi wala avaka omitami bikaloubusi, akamitulibogwi wala vavagi makwaisina igau gala bikaloubusisi, e baisa bikatubodi udomi metoya bigatona mwada mi tokolu minasina migawelu migawelu leivigakaisi vavagi makwaisina eikaloubusisi makawala.

⁶“Komwaidona avaka lalivalibogwi baisa tuta eikikaloubusisi; mapaila ibodi bukukwabwailisi ulo vitoubobuta, paila bogwa lakamokwita. E baisa tuta balukwaimi paila vavagi kwaiuwovau igau bikaloubusisi, vavagi makwaisina gala kwaitala tuta ayomitali omitibogwa.

⁷Baisa wala tuta bavigaki vavagi makwaisina bikaloubusisi; gala avai vavagi makawala makwaisina ikaloubusi omitibogwa. Mitaga kidamwa bikaloubusibogwa makawala, yokomi bukulivalasi mwada vavagi makwaisina bogwa kunikolibogwisi.

⁸Yeigu anikolibogwi wala yokomi gala wala bisim kami dubumi. Tuta komwaidona yokomi kami nikoli mina kowolova wala. Baisa uula gala avai tuta kuligikolaisi vavagi makwaisina e avaka paila gala sitana kulagaisi livalela.

⁹“Yeigu aiyosi wala agu leiya e ibulukumlaigu, kidamwa wala tomota biyakawolaisi yagagu. Yeigu ibulukumli wala agu leiya e gala bakatudoumwaimi.

¹⁰Yeigu bogwa lawakolaimi metoya okovala kabommayuyu makawala siliba leiwakolaisi wa kova e labani yokomi gala wala dimlemi.

¹¹Avaka auvagi bogwa lavagi paila wala tatougu. Yeigu gala bavigaki yagagu bikaluwouwaisi kaina batagwala bagibilisi agu kwatububula baisa availa. Makwaina katububula ibodi agumwaleta wala bisusukwaigu, e agumwaleta wala, gala taiyuwaigu.”

¹²Guyau ikaibiga kawala, “Mina Isireli, kunakaigalaigusi, yokomi bogwa lanagaimi. Yeigu Yaubada, kabovitouula, deli kabovigimkovila, agumwaleta wala Yaubada!

¹³E oyamagu abubuli valu watanawa tumilela, deli akatuvakai labuma. Avai tuta adou valu watanawa deli labuma bimakaiagusi, saina nanakwa imaisi e itolisi omatagu.

¹⁴“Ka, komwaidomi wala yokomi, kumaisi gulitinidesi e kulagaisi! Gala natana yaubada minasina tokolu ibodi bivitububoti paila tau matauna bogwa lanagi biyouli Babiloni; matauna bivagi avaka wala nanogu bivagi.

¹⁵Yeigu goli matoulegu lalivala deli ladou matauna. Lavakadi matauna deli avigaki bitomgwaga.

¹⁶“Baisa tuta kumakaiagusi katitaikinaigu e kunakaigalaisi avaka balivala. Tuta okala vitouula ulo biga bogwa lakabau baisa yokomi, deli tuta komwaidona avigaki ulo biga gala bisala.” (Tuta baisa Guyau Yaubada bogwa ikatupewolaigu e iwitalaigu.)

¹⁷E Isireli la Yaubada tobumaboma, matauna goli Guyau eikatumovaimi, ilivala kawala. “Yeigu goli Guyau mi Yaubada, yeigu magigu bavitulokaimi paila kami bwaina titoulemi deli bavakadaimi wa keda makadana ibodi bukulokaiasi.

¹⁸“Kidamwa goli bukunakaigalaisi ulo karaiwaga! E bobwailila bogwa bitayelu baisa yokomi makawala sakala gala avai tuta bimada! Tomgwaga bogwa bimakaiami makawala kaisai eiwawai okudunagana.

¹⁹Dalemi kala bawa bivigaki makawala kanakenuva, e yeigu goli bayamati matausina e gala avai tuta bidoumsi.”

²⁰Ka, bogwa latanekwaimi bukusilavaisi Babiloni, kulosi! Deli mi mwasawa kukwayayaisi bulogala mwakwaina; e kuvigakaisi binikolaisi ambaisa ambaisa, kawami, “Guyau bogwa leikoli la touwata mina Isireli!”

²¹Avai tuta Guyau ivisunupuloi la tomota ilau oviloupakala saina yuviyavi, matausina gala ilumkolaisi daka la peula. E matauna ivagi kasi sopi bikaloubusi metoya odakuna. Ikatuvi dakuna ikapogega, e sopi igiposisi.

²²E Guyau ilivala kawala, “Ka, gala wala kwaitala kabokwala isisu paila mina mitugaga.”