Read Kilivila AISEA 49 Bible Online

AISEA 49 - Kilivila bible

AISEA 49

¹Yokomi boda ituwoli ituwoli omiloutala, yokomi tomota lokusisuaisi omiloutala, kunakaigalaigusi! Ka, yeigu igau wala gala bakaloubusi, e Guyau bogwa wala leinagaigu e leiyosalaigu kidamwa yeigu la touwata.[50]

²E matauna ivigaki ulo biga makawala kema kala kakata, e metoya oyamala titoulela matauna ikolaigu.[51] Ivigakaigu makawala kaitala kaiyala, kaikakata deli eiyamwasi paila bilavi.

³E Guyau ilukwaigu kawala, “Isireli, yoku ulo touwata. Tomota biyakawolaigusi, uula goli yoku.”

⁴E yeigu alivala kawagu, “Yeigu bogwa lapaisewa, mitaga ulo paisewa gala wala dimlela! Ulo peula komwaidona bogwa layomadi, mitaga gala wala avai vavagi avigimkulovi.” Mitaga ibodaigu badubumi Guyau e matauna biyamati ulo wotetila. Matauna goli bimapwaigu paila avaka lauvagi.

⁵E ka, igau wala yeigu gala bakaloubusi, mitaga Guyau bogwa wala einigibogwaigu. Matauna eivigakaigu la touwata kidamwa bakaimilivau la tomota, kidamwa bakaimilivau la tomota mina Isireli matausina bogwa leiwaki neuya. E Guyau isakaigu agu taimamila. E matauna goli uulela ulo peula.

⁶E Guyau ilukwaigu kawala, “Mwa! Ulo touwata, bogwala makawala lalukwaim, yoku bukuvigivau e bisiligaga kasi bwaina mina Isireli matausina eikesasi mina mmomova. Mitaga kwaitala tuvaila vavagi kwedabala paila yoku bukuvagi. Ka, yeigu bavigakaim makawala kaitala kaitapa baisa boda ituwoli ituwoli - e igagabila mina watanawa komwaidona bibanaisi kasi katumova.”

⁷Tomota eididokaigusi gala wala dimlegu. Boda ituwoli ituwoli ivigakaigusi tokukolosi, deli yeigu si ula tokwaraiwaga. Mitaga ka, Isireli la Yaubada Tobumaboma deli tokatumova eilukwaigu kawala, “Ka, gweguya bogwa wala bigisaimsi bukusunapula metoya okatupipi e matausina bikululusi paila kam kwamaiaba. E gweguya dalesi tuvaila bigisaisi makawala, e matausina bikululusi bilosi watanawa paila kam taimamila.” Ka, vavagi makwaisina bogwa wala bikaloubusisi paila uula bogwa einagaigu yeigu la touwata. Paila da Yaubadasi mina Isireli, matauna tobumaboma iiyamati e iuvagi makawala la biga katotila.

⁸E Guyau iluki la tomota kawala, “Avai tuta bibodi kala tuta paila yeigu bakatumovaimi, e yeigu bapilasaimi, e bamapu mi dou paila pilasi. Yeigu bayamataimi deli bakolaimi, e yeigu bavigakaimi bukukwabutusi deli tomota komwaidona. Yeigu batugwalaimi bukumili valusi tuvaila omi valu makwaina baisa tuta vilouwokuva wala.

⁹E yeigu baluki matausina okatupipi kawagu, ‘Kulosi yokomi bogwa latanekwaimi!’ e availa matausina isisuaisi odubilikitakita baluki kawagu, ‘Kusunapulasi kumaisi olumalama!’ Matausina makawala sipi bikamkwamsi mnumonu wa koya;

¹⁰matausina gala avai tuta tuvaila bikamolusi kaina bikadakasi. Kalasia deli viloupakala kala yuviyavi gala biyogagi matausina, paila uula taitala kasi tovakeda isisu, matauna saina iyebwaili matausina. Matauna bivakadi matausina bilau okatuwotu.

¹¹“Yeigu bateya kadatala kaduwala bisuwalai koya makwaisina e bakatubiasi makadana paila ulo tomota bililoulasi.

¹²Ulo tomota bimaisi metoya saina kaduwonaku, tolesi opiliyavata deli tolesi opilikwaibwaga e deli tolesi Asiwani opilibolimila.”

¹³Bubuli wa labuma kuwosisi! Mina watanawa kudousi deli mi mwasawa! E yokomi koya kwatuvitawaisi kami wosi! Paila Guyau bivisimoli la tomota; matauna binokapisi la tomota matausina eibodasi mmayuyu.

¹⁴Mitaga mina Yerusalem eikaibigasi kawasi, “Ka! Guyau bogwa eisilavaidasi! Matauna bogwa wala eilumwelavaidasi.”

¹⁵E mapaila Guyau ivitakauloki matausina kawala, “Ki! ibodi natana vivila bilumwelavi latula titoulela e gala biyebwaili magudina eiunoki lopola? E kaina goli natana vivila ibodi bilumwelavi latula mitaga yeigu gala wala avai tuta balumwelavaimi.

¹⁶Yerusalem, yeigu gala wala ibodi balumwelavaim! Paila yeigu bogwa lagini yagam okwailopola yamagu.

¹⁷“Matausina bikaliivauwaimsi bogwa makateki bikaloubusisi. Mitaga matausina eikodidaimimsi bogwa bigalasi bilosi.

¹⁸Kumitavila ambaisa ambaisa e kugisi avaka eikikaloubusi! Ka! m tomota bogwa eikukougugulasi eidadeilisi eimeimaisi osi valu! Kidamwa bukudubumi mwada yeigu Yaubada tomomova ibodi bukudubumi baisa ulo biga. Ka! yoku ibodaim bukumwasawa paila m tomota, m mwasawa makawala natana navaivau la mwasawa paila isim kala katuvila.

¹⁹“Omitibogwa mi valu ikodidaimisi e ivilouwokuva wala, mitaga baisa tuta bidubadu eimeimaisi e bisilaisi baisa e matausina bidokaisi saina viloukekita. E matausinaga eiligaimwaisi mi valu kwedadaimi wala itotu, bogwa bisikaduwonakusi metoya baisa yokomi.

²⁰Igau kwaitala yam tomota matausina eivilulaisi metoya okatupipi bilivalasi kawasi, ‘Valu makwaina saina kwekekita - magidasi tuvaila tumila paila bitasilaisi!’

²¹E tosibogwa bilivalasi titoulesi kawasi, ‘Availaga eiunai komwaidona magudisina gugwadi? Yakidasi bogwa takitumouwaisi litudoiasi e gala wala tuvaila bitabinivauwaisi. E sedaiasi bogwa eikatupipaisi e eilauwaisi - mitaga availa eiunai magudisina gugwadi? Yakidasi iligaimwaidasi wala kadamwaletasi tasisuaisi - mitaga ammetoyaga magudisina leimaisi?’”

²²E Guyau Yaubada iluki la tomota kawala, “Yeigu bakatulokwasi boda ituwoli ituwoli, e matausina bimaiyaisi litumia omi valu.

²³Gweguya bukuvigakaisi makawala tumimia, giyouvila bukuvigakaisi makawala inumia. E komwaidosi wala bitapopula kwetutusi omitami e bitemmalaimi. Matausina bikavaginasi e bikimitalaisi si kamaiaba paila yokomi. E yokomi bukunikolaigusi yeigu wala Guyau; e gala wala availa bitulowaka paila bapilasi.”

²⁴Ki! ibodi bukulebuvau metoya oyamala taitala tokabilia avaka eilebu? Kaina ibodi bukukoli tokatupipi metoya oyamala taitala giyougaga?

²⁵E Guyau imapu kawala, “Baisa bogwa makawala avaka bikaloubusi. Ka! matauna tokabilia kala tokwatupipi matausina yeigu bakaimilivau, deli balebuvau guguwa makwaisina eilebu. Yeigu bakabilia baisa availa matauna magila bikabilia baisa yokomi, e yeigu bakoli litumia.

²⁶Yeigu bavigaki matausina eilamidadaimi bikatumataisi sesia titoulesi. Matausina bogwa bitaboda ninasi metoya osi katumata deli osi peisaga. E komwaidona mina watanawa binikolaisi yeigu wala Guyau, yeigula wala lakatumovaimi deli latanekwaimi. E binikolaisi yeigu mina Isireli si Yaubada Topeuligaga.”